ރައްޔިތުންގެ މަޖިލީހުގެ ކާށިދޫ ދާއިރާގެ ކުރީގެ މެންބަރު ޢަބްދުﷲ ޖާބިރު ވެރިކަންކުރާ ޕީއެންސީއާ ގުޅިވަޑައިގަތުމާއެކު، ގިނަ އަދަދެއްގެ ޒުވާނުން އެ ޕާޓީއާ ”ހޯސްލާފައި“ ގުޅޭނެ ކަމަށް އޭނާ ވިދާޅުވެއްޖެއެވެ.
”މިހާރު“ ނޫހަށް ދެއްވި އިންޓަވިއުއެއްގައި ޖާބިރު ވަނީ އޭނާގެ ސިޔާސީ ކުރިމަގާއި ގުޅޭގޮތުން މުހިންމު ވާހަކަތަކެއް ހިއްސާކުރައްވާފައެވެ.
”އަޅުގަނޑު ޕީއެންސީއާ ގުޅުމުގެ ނަތީޖާއަކީ ޒުވާނުން މި ޕާޓީ އަށް ހޯސްލާފައި ގުޅުން“ ޖާބިރު ވިދާޅުވިއެވެ.
ޖާބިރު ވިދާޅުވީ، ޕީއެންސީއާ ގުޅިވަޑައިގަތުމަށް ނިންމެވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ހަރުދަނާ ޑިމޮކްރެޓިކް ސިޔާސަތުތަކާއި، ގައުމުގެ ތަރައްގީއަށް އެމަނިކުފާނު ކުރައްވާ އިޚްލާޞްތެރި މަސައްކަތްޕުޅުތައް ފެނިވަޑައިގަތުމުން ކަމަށެވެ. ޚާއްޞަކޮށް ރައީސް މުޢިއްޒުގެ މުރާލިކަމާއި، ހީވާގިކަމުގެ އިތުރުން މަސައްކަތްތައް ކުރިއަށްގެންދަވާ ބާރުމިނާމެދު ވަރަށް ބޮޑަށް ގަޔާވާކަމަށް ޖާބިރު ފާހަގަކުރެއްވިއެވެ.
”އެ މަނިކުފާނުގެ މުރާލިކަމާއި ހީވާގިކަމާއި ރައީސްގެ އެ ސްޕީޑުގައި މަސައްކަތް ކުރެއްވުމުން ވަރަށް ގަޔާވޭ. އެހެންވެ އަޅުގަނޑުގެ ސިޔާސީ ތަޖުރިބާއާ އެކު މަސައްކަތް ކޮށްލުމަށް ޕީއެންސީއާ ގުޅުނީ،“ ޖާބިރު ވިދާޅުވިއެވެ.
ޖާބިރު ވިދާޅުވި ގޮތުގައި ޕީއެންސީގައި މި ވަގުތު އޭނާގެ އެންމެ ފުރަތަމަ އަދި އެންމެ އިސް މަސަކަތަކަށް ވާނީ އަންނަ ޖޫން މަހުގެ ހަ ވަނަ ދުވަހު ބާއްވާ ބައި އިލެކްޝަންގައި އެ ޕާޓީ އަށް ރައްޔިތުންގެ މަޖިލިހުގެ އައްޑޫ ހިތަދޫ އުތުރު ދާއިރާގެ ގޮނޑި ކާމިޔާބު ކޮށްދިނުން ކަމަށެވެ.
ޖާބިރު މީގެކުރިންވެސް އެކި ސިޔާސީ ޕާޓީތަކާއި ގުޅިވަޑައިގެން މަސައްކަތް ކުރައްވާފައިވާއިރު އޭނާ ވަނީ ރައީސް މައުމޫނު އުފެއްދެވި ޑީއާރުޕީގެ ލީޑަރުކަންވެސް ކުރައްވާފައެވެ.
މީގެއިތުރުން އެމްޑީޕީ އަދި ޖޭޕީގައި މުހިންމު މަސައްކަތްތަކެއް ޖާބިރު ކުރެއްވިއެވެ. އެގޮތުން ޖޭޕީގެ ނައިބު ލީޑަރުކަން ޖާބިރު ވަނީ ކުރައްވާފައެވެ. އަދި އެމްޑީޕީގެ ރައީސްގެ އެޑްވައިޒަރު ކަމުގެ މަސައްކަތް ކުރެއްވުމަށް ފަހު 2023 ވަނަ އަހަރު ޖާބިރު ވަނީ ”ގްރީން ޕާޓީ“ ނަމުގައި ޕާޓީއެއް ވެސް އުފައްދަން ހުށަހަޅުއްވައިފަ އެވެ. ނަމަވެސް އެ ޕާޓީއަށް މީހުން ހަމަނުވުމުން ރަޖިސްޓްރީއެއް ނުކުރެ އެވެ. އަދި އޭނާ ލީޑަރުކަން ކުރެއްވި ޑީއާރުޕީވެސް ވަނީ މެންބަރުންގެ އަދަދު ހަމަނުވާތީ 2023 ވަނަ އަހަރު އުވާލާފައެވެ.
