ހެޔޮ ބަދަލުތަކާއެކު ދެން ފެށިގެންދާނީ ޕީއެންސީގެ ހަގީގީ ވެރިކަމެއް ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އަދި ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވެއްޖެއެވެ.
ޝުޖާއު މި މޭރުމުން ވިދާޅުވީ، މި މަހުގެ ހަތަރު ވަނަ ދުވަހު ބޭއްވި ލޯކަލް ކައުންސިލްތަކުގެ އިންތިހާބުގައި ހއ. ފިއްލަދޫއިން ޕީއެންސީގެ ކެންޑިޑޭޓުން ހޯދާފައިވާ ކާމިޔާބީ ފާހަގަކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. ޝުޖާއު ވިދާޅުވީ، މި ހަފްތާ ތެރޭގައި ކުރީގެ ދެ ރައީސުން ކަމަށްވާ ޢަބްދުﷲ ޔާމީނާއި، މުޙައްމަދު ނަޝީދުގެ އިތުރުން އިދިކޮޅު އެމްޑީޕީގެ ލީޑަރުން ގުޅިގެން ކޮންމެ ރެއަކު ވަރުގަދަ ސައްލާތައް ކޮށް ”މާލޫދު“ ކިޔަވާ ކަމަށެވެ.
”އެއްބައި ރޭރޭ ކަންމަތި ސިޓިންގރޫމްގައި އަނެއް ބައި ރޭރޭ ސިއްކަމެން ގޭ ތެރޭގައި މި ކިޔަވާ މާލޫދަކީ މި މީހުން ޖެހޭނެއޭ އަހަރުމެން ކައިރިއަށް އަންނަން، މި މީހުންނަކަށް ލޯނެއް ނުދެއްކޭނެއޭ ލޯނު ދެއްކޭނެ ވާހަކަ އަންނަންވާނީ އަހަރުމެންނާއި އެކީގައޭ ދައްކަން، ދައްކާފައި މި ދައްކަނީ ދިވެހި ސަރުކާރުން އެމްޑީޕީން ނަގާފައި އޮތް 400 މިލިއަން ޑޮލަރުގެ ވާހަކައެއް، މިކަން އަހަރުމެންނާ ނުލައެއް ރައީސް މުޢިއްޒަކަށް ނުނިންމޭނޭ ޖެހޭނީ މޭޒު ދޮށަށޭ އަންނަން،“ – ޝުޖާއު ވިދާޅުވިއެވެ.
ޝުޖާއު ވިދާޅުވި ގޮތުގައި ސިޔާސީ ގޮތުން ރާއްޖޭގައި މިހާރު ހިނގަމުން އަންނަ ހަމަނުޖެހުންތަކުގެ އެންމެ އަޑީގައި ތިބީ ކުރީގެ ތިން ރައީސުން ކަމަށްވާ ނަޝީދާއި، ޔާމީނާއި އަދި އިބޫއެވެ. ޝުޖާއު ވަނީ އެމްޑީޕީ ސަރުކާރުގައި ނަގާފައިވާ ލޯނުތައް އަނބުރާ ރޯލްއޯވަރ ކުރެވޭނީ ރައީސް މުޢިއްޒު އެބައިމީހުންގެ ފައިބުޑަށް ވެއްޓިގެން ކަމަށް ބުނަމުންދާތީ އެކަމަށް ވެސް ވަރަށް ބޮޑަށް ފާޑު ވިދާޅުވެފައެވެ.
ނަމަވެސް އެމްޑީޕީން ނަގާފައިވާ 400 މިލިއަން ޑޮލަރާއި، 925 މިލިއަން ޑޮލަރުގެ އިތުރުން 1.4 ބިލިއަން ރުފިޔާ މި ހިނގާ އޭޕްރީލް މަހުގެ ތެރޭގައި ދައްކާފައިވާކަން ފާހަގަކުރައްވަމުން ޝުޖާއު ވިދާޅުވީ، މި ހުރިހާ ލޯނެއް ނަގައިގެން ވެސް އެމްޑީޕީ ސަރުކާރުގައި ހަމައެކަނި ކުރި ކަމަކީ އެ ފައިސާތައް ކެއުން ކަމަށެވެ.
ޝުޖާއު އިތުރަށް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށްފަހުގައި ގައުމު ހަމަމަގަށް އެޅުވުމަށް ވަރަށް ގިނަ މަސައްކަތްތަކެއް ފައްޓަވާފައިވާ ކަމަށެވެ. ކަން މިހެން އޮތުމާއެކު ކުރިއަށް އޮތްތަނުގައި ދެން ފެށިގެންދާނީ ޕީއެންސީގެ ހަގީގީ ވެރިކަމެއް ކަމަށް ވެސް އޭނާ ވިދާޅުވިއެވެ.
