ށ. މިލަންދޫގެ ގެއަކުން ގިނަ އަދަދެއްގެ ޓީވީތަކަކާއި އަގުބޮޑު ސެންޓުފުޅިތަކެއްގެ އިތުރުން، އެހެން ގެއަކުން 120،000 (އެއްލައްކަ ވިހިހާސް) ރުފިޔާއަށް ވުރެ ގިނަ އަގުހުރި އިންޖީނު ބައިތަކެއް ވަގަށް ނެގި މައްސަލައެއްގައި ދެ މީހަކު ހައްޔަރުކޮށް، އެ ތަކެތި ފުލުހުން ހޯދައިފިއެވެ.
މި އެޕްރީލް މަހުގެ 19 ވަނަ ދުވަހު ފުލުހުންނަށް ހުށަހެޅުނު ވައްކަމުގެ މައްސަލައަކާ ގުޅިގެން، އެޕްރީލް 21 ވަނަ ދުވަހު ފުލުހުން ހައްޔަރުކޮށްފައި ވަނީ ށ. މިލަންދޫ، ރެޑްރޯސް، އަޙްމަދު ޢަޒީމް (34އ) އާއި އެ ރަށު ތަރިވިދާގެ، މުޙައްމަދު ޝިފާއު (29އ) އެވެ. މި ދެ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން، 10 ދުވަހުގެ މުއްދަތަށް ބަންދުގައި ބޭތިއްބުމަށް ކޯޓުން ވަނީ އަމުރުކޮށްފައެވެ.
މި މައްސަލައިގައި ވަގަށް ނަގާފައިވާ ތަކެތީގެ ތެރޭގައި 60 އިންޗީގެ ސްކައިވޯތް ޓީވީއަކާއި، 65 އިންޗީގެ ޓީސީއެލް ޓީވީއެއްގެ އިތުރުން 240 އެމެރިކާ ޑޮލަރުގެ އަގުހުރި ގުޗީ ފުލޯރާ ސެންޓު ފުޅިއަކާއި، ހަ ހާހެއްހާ ރުފިޔާގެ އަގުހުރި އިތުރު ސެންޓުފުޅިތަކެއް ހިމެނެއެވެ. ފުލުހުން ވަނީ މި ހުރިހާ ތަކެއްޗެއް ހޯދައި، މިހާރު ވެރިފަރާތާ ހަވާލުކޮށްފައެވެ.
މީގެ އިތުރުން، މިލަންދޫގެ އެހެން ގެއެއްގެ ގަރާޖުން ލައްކައަކަށް ވުރެ ގިނަ ރުފިޔާގެ އިންޖީނު ބައިތަކެއް ވަގަށް ނެގި މައްސަލައެއް ވެސް ފުލުހުން ވަނީ ހޯދާފައެވެ. އެޕްރީލް 18 ވަނަ ދުވަހުގެ މެންދުރުގެ ވަގުތެއްގައި ހިނގި މި ވައްކަމުގައި ވަގަށް ނަގާފައި ވަނީ ޔަމަހާ ބްރޭންޑްގެ އައުޓްބޯޑް ގިޔަރަކާއި އޭގައި އަޅުވާފައިވާ ބުރަފައްޗެކެވެ. ވެރިފަރާތުން މަޢުލޫމާތު ދޭ ގޮތުގައި މި ތަކެތީގެ އަގު 120،000 ރުފިޔާއަށް ވުރެ ބޮޑެވެ.
ފުލުހުން ކުރި މަސައްކަތުން އެނގުނު ގޮތުގައި، ވަގަށް ނެގި މި އިންޖީނު ބައިތައް ވަނީ އެޕްރީލް 18 ވަނަ ދުވަހުގެ މެންދުރުފަހު 2:30 ހާއިރު، މިލަންދޫ ފަޅުތެރޭގައި އޮތް ބޯޓެއްގެ ކައްޕިއަށް އެންމެ 2،500 ރުފިޔާއަށް ވިއްކާލާފައެވެ. ފުލުހުން އެ ބޯޓަށް ގޮސް ބަލައިފާސްކުރިއިރު، ވަގަށް ނެގި ތަކެތި ފެނިފައި ވަނީ ބޯޓުގެ އިންޖީނުގެ ވަތުތެރޭގައި ފޮރުވާފައި ވަނިކޮށެވެ.
މި ދެ މައްސަލަވެސް ފުލުހުން ދަނީ އިތުރަށް ތަހުގީގު ކުރަމުންނެވެ.
