ތިލަމާލެ ބްރިޖްގެ މަޝްރޫއުގެ 72 އިންސައްތަ މަސައްކަތް ނިމިފައިވާ ކަމަށާއި އަމާޒަކީ އެއްވެސް ހުއްޓުމެއް ނެތި މަސައްކަތް ކުރިއަށްގެންދިއުން ކަމަށް ހައުސިންގ މިނިސްޓަރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.
މިނިސްޓަރު މުއްޠަލިބް މި މޭރުމުން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ތިލަމާލެ ބްރިޖްގެ އެންމެ ފަހުގެ މައުލޫމާތުތައް ނޫސްވެރިންނާ ހިއްސާކުރައްވަމުންނެވެ. މިނިސްޓަރު ވިދާޅުވީ، ބްރިޖްގެ މަސައްކަތް ކުރިއަށްދާގޮތަށް ބަލާއިރު މަޝްރޫޢުގެ 72 އިންސައްތަ މަސައްކަތް މިހާރު ނިމިފައިވާ ކަމަށެވެ.
ބްރިޖްގެ މަސައްކަތްތައް ކުރިއަށްދާ ގޮތުގެ ތަފްސީލަށް އަލިއަޅުއްވާލައްވަމުން މިނިސްޓަރު ވިދާޅުވީ، މިހާރު މައިގަނޑު މަސައްކަތެއްގެ ގޮތުގައި ކުރިއަށްދަނީ ސެގްމެންޓްގެ ކާސްޓް ކުރުމުގެ މަސައްކަތާއި ސެގްމެންޓްތައް ބްރިޖްގެ ތަނބުތަކާ ގުޅުވާލުމުގެ މަސައްކަތް ކަމަށެވެ.
”އަޅުގަނޑުމެންގެ އެންމެ ބޮޑު އެއް އަމާޒަކީ މަސައްކަތް ނުހުއްޓި، ވީހާވެސް އަވަހަކަށް މަސައްކަތް ނިންމާލުން، ނަމަވެސް ކުރިން ވެސް އަޅުގަނޑު ދަންނަވާލި ފަދައިން، ކަނޑައަޅާފައިވާ ތާރީހުތަކުގައި މިހާރު ޕްރޮޖެކްޓެއް ނުނިމޭނެ،“ – މިނިސްޓަރު މުއްޠަލިބް ވިދާޅުވިއެވެ.
މިނިސްޓަރު ވިދާޅުވީ، މި މަޝްރޫއު ވީހާވެސް އަވަހަކަށް ނިންމުމަށް ކޮންޓްރެކްޓަރަށް ވެދެވެން އޮތް އެހީތެރިކަމެއް ވެދީގެން ޕްރޮޖެކްޓް ކުރިއަށް ގެންދިއުމަކީ ސަރުކާރުން ވިސްނާގޮތް ކަމަށެވެ. އެގޮތުން ކޮންޓްރެކްޓަރަށް އިތުރު ފިޔަވަޅެއް އެޅުމަކާ ނުލައި މުއްދަތު އިތުރުކުރުމަށް މަޝްވަރާ ކުރަމުންދާ ކަމަށާއި، ބްރިޖު ނިންމުމަށް މިހާރު ކަނޑައެޅިފައިވާ މުއްދަތު އަންނަ 2027 ވަނަ އަހަރު ނިމެންވާއިރަށް އިތުރުކޮށްފައިވާ ކަމަށެވެ.
ފާހަގަކޮށްލެވޭ ގޮތުގައި މި ހަފުތާގެ ހޯމަ ދުވަހު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް މުޢިއްޒު ވެސް ވަނީ ތިލަމާލެ ބްރިޖުގެ މަސައްކަތުގެ ސްޕީޑާމެދު ހިތްހަމަނުޖެހޭކަން ހާމަކުރައްވައިފައެވެ. އެގޮތުން މަސައްކަތް ނިންމުމަށް ކުރިން ކަނޑައަޅާފައިވާ ތާރީހަކީ މި އަހަރު ނަމަވެސް، މިހާރު ދީފައިވާ މުއްދަތަކީ އަންނަ 2027 ވަނަ އަހަރު ކަމަށް އެމަނިކުފާނު ވިދާޅުވިއެވެ.
