ފަތުރުވެރިންނަށް ދޫކުރާ ޓޫރިސްޓް ވިސާ މުއްދަތު ފަސޭހަކަމާއެކު އިތުރުކުރެވޭނެ ގޮތް މޯލްޑިވްސް އިމިގްރޭޝަނުން ހަދައިފިއެވެ.
މިހާރު ގެނެވުނު ބަދަލާއެކު 48 ގަޑިއިރު ތެރޭ ފަތުރުވެރިންގެ ވިސާގެ މުއްދަތު އިތުރުކޮށްދޭނެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ހޯމްލޭންޑް މިނިސްޓަރު އަލީ އިހްސާން ވިދާޅުވީ، މެދުއިރުމަތީގައި މިހާރު ކުރިއަށްދާ ހަނގުރާމައާ ގުޅިގެން ބައެއް ފަތުރުވެރިން ރާއްޖޭގައި އިތުރަށް މަޑުކުރަން އެދޭ ކަމަށެވެ. އަދި ކުރިން ވިސާގެ މުއްދަތު އިތުރުކުރުމަށް އޮންނަނީ އުނދަގޫ މަރުހަލާއެއްކަން މިނިސްޓަރު ފާހަގަކުރެއްވިއެވެ.
އެގޮތުން، ތަފާތު ނުވަ ޑޮކިއުމެންޓެއް ހުށަހަޅަން ޖެހޭއިރު ފަސް ވަރަކަށް ދުވަސް އެޕްރޫވްވާން ނަގާ ކަމަށް މިނިސްޓަރު ވިދާޅުވިއެވެ،
”އިމިގްރޭޝަނުން ކުރެވުނު މަސައްކަތުން މިއަދުން ފެށިގެން، ހަމައެކަނި ޕާސްޕޯޓް ސައިޒު ފޮޓޯއެއް ސަބްމިޓް ކުރީމަ ގާތްގަނޑަކަށް އެއްދުވަސް ނުވަތަ ދެދުވަސް ތެރޭގައި، އެމީހާއަށް އެ އެކްސްޓެންޝަން ލިބިގެންދާނެ“ މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ، އެކަންކަމަކީ މޯލްޑިވްސް 2.0ގެ ދަށުން ރައީސް ޑރ. މުހައްމަދު މުއިއްޒު ގެންގުޅުއްވާ ތަސައްވުރާ އެއްގޮތަށް ކުރިއަށްގެންދިޔަ ކަމެއް ކަމަށެވެ.
ރާއްޖެއަށް މިހާރު އަންނަ ފަތުރުވެރިންނަށް އޮންއެރައިވަލް ވިސާ ދެނީ 30 ދުވަހަށެވެ.
