ދިވެހިރާއްޖޭގައި ފިންގަރޕްރިންޓް ނުދީ، ގަވާއިދާ ޚިލާފަށް އުޅެމުންދާ 2,933 ބިދޭސީއަކު ދެނެގަނެވިފައިވާ ކަމަށާއި، އެމީހުން ހޯދައި ރާއްޖެއިން ފޮނުވާލުމުގެ ބޮޑު އޮޕަރޭޝަނެއް މި އަހަރުގެ މޭ މަހު ފެށުމަށް ތައްޔާރުވަމުންދާކަން މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ ޢަލީ އިޙުސާން އިޢުލާން ކުރައްވައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރ އިޙުސާން ވިދާޅުވީ، މިހާތަނަށް ކުރެވުނު މަސައްކަތުން ދެނެގަނެވިފައިވާ މި ޢަދަދަކީ ކަންބޮޑުވާންޖެހޭ މިންވަރެއް ކަމަށެވެ. ބިދޭސީންގެ މައްސަލަ ހައްލުކުރުމަށް ސަރުކާރުން ކުރިއަށްގެންދާ ”އޮޕަރޭޝަން ކުރަނގީ“ ގެ ތިންވަނަ ފޭސް،މި ވަނަ އަހަރުގެ މޭ މަހުގެ 2 ވަނަ ދުވަހު ފެށުމަށް މިހާރު ވަނީ ތާރީޚު ކަނޑައަޅާފައެވެ.
މި އޮޕަރޭޝަންގެ ދަށުން، އެ ތާރީޚުން ފެށިގެން ކުރިއަށް އޮތް އެއް އަހަރު ދުވަހުގެ ތެރޭގައި ރާއްޖޭގެ ހުރިހާ ހިސާބެއް ބަލައި ފާސްކޮށް، ގަވާއިދާ ޚިލާފަށް އުޅޭ ބިދޭސީން ހޯދައި ހައްޔަރުކުރުމަށްފަހު ރާއްޖެއިން ޑިޕޯޓްކުރުމުގެ މަސައްކަތް ކުރިއަށްދާނެއެވެ.
”މޭ 2026 އިން ފެށިގެން، ފިންގަރޕްރިންޓް ނުދީ އުޅެނިކޮށް އަޅުގަނޑުމެންގެ ލޯ އެންފޯސްމަންޓާ ދިމާވާ ކޮންމެ ބިދޭސީއަކީ ވަގުތުން ރާއްޖެއިން ޑިޕޯޓް ކުރެވޭނެ ފަރާތެއް،“ މިނިސްޓަރ ވިދާޅުވިއެވެ.
މިނިސްޓަރ އިތުރަށް އިލްތިމާސްކުރެއްވީ، ބިދޭސީން ގެންގުޅޭ ފަރާތްތަކުން އެމީހުންގެ ވޯކް ޕާމިޓާއި ވިސާގެ ކަންކަން ސިސްޓަމް މެދުވެރިކޮށް ގަވާއިދުން ބެލުމަށެވެ. އަދި ވިސާ ފީތައް ދައްކައި، ގަވާއިދާ އެއްގޮތަށް ބިދޭސީން ގެންގުޅުމަށް ބާރުއެޅުއްވިއެވެ.
އެންފޯސްމަންޓް މަސައްކަތް ފެށުމަށްފަހު، ގަވާއިދާ ޚިލާފުވެގެން ހައްޔަރުކުރާ މީހުން ދޫކޮށްލުމަކީ ފަސޭހަކަމަކަށް ނުވާނެކަން ފާހަގަކުރައްވަމުން މިނިސްޓަރ ވިދާޅުވީ، އިދާރީ ނުވަތަ ޕްރޮސެސިންގ މައްސަލައެއްގެ ސަބަބުން ވިސާ ނުދެއްކި ހުރި ހާލަތްތަކުގައި އެކަންކަމަށް ރިއާޔަތްކުރާނެ ކަމަށެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަމާޒު ހިފާފައިވަނީ، ރާއްޖޭގައި ބިދޭސީންގެ މައްސަލަ ދާއިމީކޮށް ހައްލުކޮށް، ހުރިހާ ބިދޭސީންނަކީވެސް ގަވާއިދުގެ ތެރެއިން އުޅޭ ބައެއްކަން ކަށަވަރުކުރުމަށެވެ.
