ޢުމްރާގެ އަޅުކަމަށް މީހުން ގެންދާ ކުންފުނިތަކާއި ގުރޫޕުތަކުން ރައްޔިތުންނަށް އިހުމާލުވެ، މަކަރާއި ހީލަތް ހަދާ މައްސަލައަށް ދާއިމީ އަދި ޢަދުލުވެރި ޙައްލެއް ގެނެވޭނީ އެކަމަށްޓަކައި ޚާއްޞަ ޤާނޫނެއް އެކުލަވާލައިގެން ކަމަށް އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ރައްޔިތުންގެ މަޖިލީހުގެ 2026 ވަނަ އަހަރުގެ ފުރަތަމަ ދައުރުގެ 11 ވަނަ ޖަލްސާގައި، މަނަދޫ ދާއިރާގެ މެންބަރު ޙުސްނީ މުބާރަކް ކުރެއްވި ސުވާލަކަށް ޖަވާބު ދެއްވަމުންނެވެ. މަޖިލީހުގެ ރައީސް ޢަބްދުއްރަޙީމް ޢަބްދުﷲ ރިޔާސަތު ބެލެހެއްޓެވި މި ޖަލްސާގައި، މެންބަރު ޙުސްނީ ވަނީ ޢުމްރާ ގުރޫޕުތަކުގެ އިހުމާލުގެ މައްސަލައަކީ އަބަދުވެސް އިވޭ، އަދި ދާދިފަހުންވެސް ފެނިގެންދިޔަ ހިތާމަވެރި ކަމެއްކަން ފާހަގަކުރައްވާފައެވެ. އަދި ތަފާތު ޤަވާއިދުތަކަށް ބަދަލު ގެނެސްގެންވެސް މިކަން ހުއްޓުވިފައި ނުވާތީ، އެކަން ހަރުދަނާކުރަން ކުރާ މަސައްކަތްތަކާ ބެހޭގޮތުން ސުވާލު ކުރައްވާފައެވެ.
މެންބަރުގެ ސުވާލަށް ޖަވާބު ދެއްވަމުން މިނިސްޓަރ ޝަހީމް ވިދާޅުވީ، މި މައްސަލައަކީ ރައްޔިތުންގެ ވަރަށް މަތީ މަސްލަޙަތުތަކަކާއި ޙައްޤުތަކަކާ ގުޅިފައިވާ ކަމެއް ކަމަށެވެ. އަދި މިކަމަށް އޮތް އެންމެ ރަނގަޅު ޙައްލަކީ ޤާނޫނީ އޮނިގަނޑެއްގެ ތެރެއިން މިކަން ތަރުތީބު ކުރުން ކަމަށް މިނިސްޓަރ ފާހަގަކުރެއްވިއެވެ.
”އަޅުގަނޑަށް ޤަބޫލުކުރެވޭ ގޮތުގައި ތިކަމަށް ޢަދުލުވެރި ޙައްލެއް ގެނެވޭނީ ތިކަމަށް ޚާއްޞަ ޤާނޫނެއް އެކުލަވާލެވިގެން. އެހެންވީމާ އަޅުގަނޑުމެންގެ ވުޒާރާގެ ފަރާތުން މިހާރު މަސައްކަތް ކުރަމުން އެބަގެންދަން ދިވެހިރާއްޖޭގެ ޙައްޖާއި ޢުމްރާގެ ކަންތައްތަކާ ގުޅޭގޮތުން ޤާނޫނެއް އެކުލަވާލަން،“ މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ، އެކުލަވާލާ އާ ޤާނޫނުގެ ތެރޭގައި މޯލްޑިވްސް ޙައްޖު ކޯޕަރޭޝަންގެ ދައުރާއި އަމިއްލަ ކުންފުނިތަކުގެ ދައުރު ފުރިހަމައަށް ބަޔާންވެފައި އޮންނާނެ ކަމަށެވެ. އަދި ކުންފުނިތަކުން ކުރާ ކުށްތަކަށް ޤާނޫނީ ގޮތުން ހަރުދަނާ ފިޔަވަޅު އެޅޭނެ ނިޒާމެއްވެސް މި ޤާނޫނުގެ ދަށުން ޤާއިމުކުރެވޭނެއެވެ.
އެހެން ޤައުމުތަކުގައިވެސް މިކަންކަން ހަރުދަނާކޮށްފައި އޮންނަނީ ޤާނޫނީ އޮނިގަނޑެއްގެ ތެރެއިންކަން ފާހަގަކުރައްވައި، މިނިސްޓަރ ވިދާޅުވީ މިއީ ފައިސާއާ ގުޅުންހުރި ކަމަކަށް ވުމާއެކު، ރައްޔިތުންގެ ޙައްޤުތައް ޙިމާޔަތްކުރުމަށް ޤާނޫނެއް އައުން ކޮންމެހެން މުހިންމު ކަމަށެވެ.
މާ ދުރުނޫން މުސްތަޤުބަލެއްގައި މި ޤާނޫނު މަޖިލީހަށް ހުށަހެޅުމަށް މަސައްކަތް ކުރައްވަމުން ގެންދަވާކަން ހާމަކުރައްވައި، މިކަމަކީ ހުރިހާ ރައްޔިތުންނާ ގުޅުންހުރި ކަމަކަށް ވާތީ، ޤާނޫނު ފާސްކުރުމުގައި ހުރިހާ މެންބަރުންގެ އެހީތެރިކަމާއި ތާއީދަށް މިނިސްޓަރ ވަނީ އެދިވަޑައިގެންފައެވެ.
”މިކަމަކީ ފައިސާއާ ގުޅުންހުރިކަމެއް، މިކަމަކީ ރައްޔިތުންގެ ވަރަށް މަތީ މަސްލަޙަތުތަކާ ޙައްޤުތަކާ ގުޅުންހުރި ކަމެއް، އެހެންވީމަ މިކަމަށް ޤާނޫނެއް އަންނަން އެބަޖެހޭ އިނގޭތޯ.. މިކަން ހުއްޓޭނީ މިކަމަށް ހަރުދަނާ ޤާނޫނީ ފިޔަވަޅުތަކެއް އެޅިގެން. އަޅުގަނޑު އެދެނީ ޢިއްޒަތްތެރި މެންބަރުން އަރިހުން އެކަމަށް ތާއީދު ކޮށްދެއްވުމަށް، އެކަމަށް މަސައްކަތްކޮށްދެއްވުމަށް އެކަން ހައްލުކުރުމަށްޓަކާ ހުރިހާ ރައްޔިތުންނާ ގުޅުންހުރި ކަމެއް ވީމަ. ޢިއްޒަތްތެރި މެންބަރުންގެ އެހީތެރިކަމާއެކު މިކަމަށް ޢަދުލުވެރި ޙައްލެއްލިބޭނީ“ މިނިސްޓަރ ޝަހީމް ވިދާޅުވިއެވެ.
ރާއްޖޭގައި ޙައްޖު ޢުމްރާ ގެ ނަމުގައި ތަފާތު ގިނަ ގުރޫޕުތައް ހަދައިންގެން އަމިއްލަ ކުންފުނިތަކުން އެތައްބަޔަކަށް އޮޅުވާލާ މަކަރާއި ޙީލަތުގެ ގިނަ މައްސަލަތަކެއް ވަނީ ފެންމަތިވެގެން ގޮސްފައެވެ. އެގޮތުން ދާދިފަހުންވެސް ގިނަބައެއްގެ އަތުން ފައިސާ ނެގުމަށްފަހު ޖާގަނެތްކަމަށްބުނެ ޢުމްރާގެ އަޅުކަމަށް ނުފުރު އެތައް ބަޔަކަށް ޙައްޖުކޯޕަރޭޝަނުން ވަނީ އެހީތެރިކަން ފޯރުކޮށްދީފައެވެ.
