އއ. އުކުޅަހުން މަސްތުވާތަކެތީގެ މައްސަލައެއްގައި މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
މި މައްސަލައާ ގުޅިގެން ހައްޔަރުކޮށްފައި ވަނީ އއ. އުކުޅަސް، ބަނަފްސާގެ، އިޝާން ޙަސަން (45އ) އެވެ. އޭނާ ހައްޔަރުކޮށްފައި ވަނީ ޑްރަގް ކޯޓަށް ހާޒިރުކުރުމަށްޓަކައި އެ ކޯޓުން ނެރެފައިވާ އަމުރެއް ތަންފީޒުކުރުމަށް މި ހިނގާ އެޕްރީލް މަހުގެ 21 ވަނަ ދުވަހުއެވެ.
ފުލުހުން ބުނި ގޮތުގައި، އިޝާން ޙަސަން ހައްޔަރުކޮށް ބަލައިފާސްކުރިއިރު، މަސްތުވާތަކެތި ކަމަށް ބެލެވޭ އެއްޗެއް ހުރި 45 ކަރުދާސްކޮޅު އޭނާގެ އަތުން ވަނީ ފެނިފައެވެ.
މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ އޭނާ ފަސް ދުވަހުގެ މުއްދަތަށް ބަންދުކުރުމަށް އަމުރުކޮށްފައެވެ.
ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
