އެމްޑީޕީން ކުރިއަށްގެންދިޔަ މުރާހަރާއެއްގައި މީހަކަށް އަނިޔާވީ ފުލުހުން އެޅި ފިޔަވަޅުތަކުގެ ސަބަބުން ނޫން ކަމަށް ދިވެހި ފުލުހުންގެ ހިދުމަތުން ބުނެފިއެވެ.
މިކަމާ ގުޅިގެން މީޑިއާތަކަށް ފޮނުވި މެސެޖެއްގައި ފުލުހުން ބުނީ، އެއްވުމެއް ހިނގަމުންދިޔަ ސަރަހައްދަކުން ރޭގެ ވަގުތެއްގައި ހޮސްޕިޓަލަށް ގެންދެވުނު މީހަކަށް އަނިޔާވެފައިވަނީ، އެއްވުމާ ގުޅިގެން ފުލުހުން އެޅި ފިޔަވަޅުތަކެއްގެ ސަބަބުން ކަމަށް ބުނެ ފަތުރަމުންދާ ވާހަކަތައް ފުލުހުންގެ ސަމާލުކަމަށް އައިސްފައިވާ ކަމަށެވެ.
”އެއްވުން ކޮންޓްރޯލް ކުރުމަށް ފުލުހުން ހިންގި އެއްވެސް ހަރަކާތަކާ، އެ މީހާއަށް އަނިޔާ ލިބުމާ ނުވަތަ ހާލު ދެރަވުމާ ގުޅުމެއް ނެތް، ފެތުރެމުންދާ ވާހަކަތަކާ ހިލާފަށް ރޭގެ އެއްވުން ކޮންޓްރޯލް ކުރުމުގައި ފުލުހުން ބާރުގެ ބޭނުންކޮށްފައެއް ނުވޭ، އަދި އެއީ އެއްވުމާ ގުޅިގެން ފުލުހުން އެޅި އެއްވެސް ފިޔަވަޅެއްގެ ސަބަބުން ހިނގާފައިވާ ކަމެއް ނޫންކަމުގެ ޔަގީންކަން އަރުވަން،“ – ދިވެހި ފުލުހުންގެ ހިދުމަތުން ބުންޏެވެ.
ހަގީގަތާ ހިލާފު ދޮގު މައުލޫމާތު ފެތުރުމުގެ ސަބަބުން ދައުލަތުގެ މުއައްސަސާތަކަށް އޮންނަ އިތުބާރު ކުޑަވެ، ރައްޔިތުންނަށް ފޯރުކޮށްދޭ ހިދުމަތްތަކަށް ނޭދެވޭ އަސަރުތަކެއް ކުރާކަން ފާހަގަކުރަމުން ފުލުހުން ވަނީ، މައުލޫމާތުގެ ސައްހަކަން ކަށަވަރުކުރުމަށްފަހު މެނުވީ މައުލޫމާތު ނުފެތުރުމަށް އިދާރާތަކަށާއި މީޑިއާތަކަށާއި އާންމުންނަށް އިލްތިމާސްކޮށްފައެވެ.
ފާހަގަކޮށްލެވޭ ގޮތުގައި އެމްޑީޕީއަކީ މިފަދަ ކަންކަމުގައި ސަރުކާރުގެ އިދާރާތަކާއި ކަމާ ބެހޭ ފަރާތްތައް ބަދުނާމު ކުރުމަށް އަބަދުވެސް މަސައްކަތް ކުރާ ބައެކެވެ. އެގޮތުން އެ ޕާޓީން މި ފަހުން ބޭއްވި މުރާހަރާއެއްގައި، މުޒާހަރާގެ ބައިވެރިން ވަނީ ފުލުހުންގެ ވާޖިބަށް ހުރަސްއަޅައި، ފުލުހަކަށް އަނިޔާދީ ޒަހަމް ވެސް ކޮށްލައިފައެވެ.
