ރާއްޖޭގެ ފުޓްބޯޅަ އަށް 75 އަހަރު ފުރުން ފާހަގަކުރަން ބާއްވާ ޑައިމަންޑް ޖުބިލީ އިންޓަނޭޝަނަލް މުބާރާތަށް ގައުމީ ޓީމުގެ ސްކޮޑް އެކުލަވާލައި، އަންނަ އާދީއްތަ ދުވަހު ޕްރެކްޓިސް ފަށަން ނިންމައިފި އެވެ.
މި ސަރަހައްދުގެ ތިން ގައުމެއް ބައިވެރިކޮށްގެން ޖުމްލަ ހަތަރު ޓީމާ އެކު ބާއްވާ މުބާރާތް އޮންނާނީ ޖޫން 1-10 އަށް ގަލޮޅު ދަނޑުގަ އެވެ.
މިއަދު ރާއްޖޭގެ ސްކޮޑް އިއުކާނުކޮށްފައިވާއިރު، އެ ސްކޮޑްގައި ޒުވާން އަދި ގައުމީ ޓީމުގައި ޒަމާންވީ ކުޅުންތެރިންވެސް ހިމެނެއެވެ. އެގޮތުން ތަޖުރިބާކާރު ކުޅުންތެރިންގެ ތެރޭގައި އަލީ އަޝްފާގް (ދަގަނޑޭ)، ކެޕްޓަން ސަމޫހު އަލީ (ސަމުއްޓެ) ފަދަ ކުޅުންތެރިން ހިމެނެއެވެ. އަދި ސްކޮޑްގައި ޒުވާން އީލާންވެސް ހިމެނެއެވެ.
އެ މުބާރާތުގައިވެސް ރާއްޖޭގެ ކޯޗުކަންކޮށްދޭނީ އުރުބާނީއެވެ.
ގައުމީ ޓީމަށް ކުރިން ދެ ފަހަރެއްގެ މަތިން ކޯޗުކޮށްދީފައިވާ އުރުބާނީ އަލުން ޓީމާ ހަވާލުވެ ކުޅުނު ފުރަތަމަ މެޗުން އޭޝިއަން ކަޕް ކޮލިފައިންގައި މިދިޔަ މަހު މާލޭގައި ވަނީ ޓިމޯ ލެސްޓޭ އަތުން 2-1 އިން މޮޅުވެފަ އެވެ.
