ޖަޕާނަށް 7.5 މެގްނިޓިއުޑް ބާރުމިނުގެ ބިންހެލުމެއް އައުމާއިއެކު މިއަދު ޖަޕާނުން ވަނީ އެޤައުމުގެ އުތުރުން އިވާޓޭ، އައޮމޯރީ، އަދި ހޮކައިޑީ ސަރަހައްދުތަކަށް ސުނާމީ އަރާނެކަމަށް ލަފާކޮށް އިންޒާރު ނެރެފައެވެ. ބިންހެލުން ވަޒަންކުރާ މިންގަޑުކަމަށްވާ ރިޗާ ސްކޭލް އިން 7.5 ބާރުމިނަކީ ބޮޑު ބިންހެލުމެއް ކަމަށް ވާއިރު، ސުނާމީގެ ސަބަބުން 3 މީޓަރު އުސްމިނުގައި އުދަބާނިތައް އަރާނެކަމަށް ޖަޕާނުގެ ކަމާއިބެހޭ ފަރާތްތަކުން ލަފާކުރެއެވެ.
މިއާއެކު ޖަޕާނުގެ ބޮޑު ވަޒީރު ވަނީ ޓުވިޓާގައި ކޮށްފައިވާ ޕޯސްޓެއްގައި އުސް ތަންތަނުގައި ރައްކާތެރިކަން ހޯދުމަށް އިރުޝާދު ދީފައެވެ. ”ސުނާމީގެ އިންޒާރު ނެރެފައިވާ ސަރަހައްދުތަކުގައި ދިރިއުޅޭ ރައްޔިތުން ވީ އެންމެ އަވަހަކަށް އުސް ތަންތަނުން ރައްކާތެރިކަން ހޯދައި، ނުވަތަ އެވެކުއޭޝަން އިމާރާތްތަކާއި އެހެން އުސް އަދި ރައްކާތެރި ތަންތަނަށް ދާންޖެހޭނެ”، އޭނާ ބުނެފައިވެއެވެ.
