ދ. މީދޫ މަސްދޯންޏެއްގައި 2021 ވަނަ އަހަރުގެ މާޗު މަހުގެ ތެރޭގައި ވަޅިން ހަމަލާދީ ބަންގްލަދޭޝްގެ މުހައްމަދު ޝާހީން މަރާލި މައްސަލައިގައި ދައުވާކުރި، އެ ގައުމުގެ މުހައްމަދު މަސްއޫދުގެ މައްޗަށް، ކުށް ސާބިތުވެ އުމުރަށް ޖަލަށްލުމަށް ކުރިމިނަލް ކޯޓުން ހުކުމް ކޮށްފިއެވެ.
މަސްއޫދުގެ މައްޗަށް ދައުލަތުން ކުރީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެފަސް ވަނަ މާއްދާގެ (ހ) އާ ހަވާލާދީ، އެމާއްދާގެ (ނ) އާއި (ރ) ގެ ދަށުން ގަސްދުގައި މީހަކު މެރުމުގެ ކުށުގެ ދައުވާއެވެ.
ދިޔަ ބުރާސްފަތި ދުވަހު ކްރިމިނަލް ކޯޓުން ކުރި ހުކުމުގައި ވަނީ އެ ދައުވާއަށް މަސްއޫދު އިންކާރުކުރި ނަމަވެސް، އޭނާއާ ދެކޮޅަށް ހުށަހަޅާފައިވާ ހެކި ގަރީނާއިން އެ ކުށްކުރީ އޭނާކަން ސާބިތުވާ ކަމަށެވެ. އެގޮތުން ޝާހީނަށް ހަމަލާ ދިންއިރު، މަސްއޫދުގެ އަތުގައި ވަޅި އޮތްއިރު އެ ވަޅިން އޭނާގެ ޑީއެންއޭ ފެނިފައިވާ ކަމަށް ވެސް ހުކުމުގައިވެ އެވެ.
މި މައްސަލައިއި އެ ހަމަލާއަކީ މަރައިލުމުގެ ނިޔަތުގައި ދިން ހަމަލާއެއް ނޫން ކަމަށް މަސްއޫދު ބުނި ނަމަވެސް، ހަމަލާގެ ކުރިން އެ ދެ މީހުންގެ މެދުގައި ހަމަނުޖެހުމެއް ހިންގާފައިވުމުން އެ ހަމަލާއަކީ، ”އިންސިޑެންޓެއް“ ކަމަށް ވުމުގެ ފުރުސަތު ކުޑަކަމަށް ސީން ރިކޮންސްޓްރަކްޝަން ރިޕޯޓްގައި ވަނީ ބަޔާންކޮށްފައެވެ.
އެހެންވެ، ހުކުމުގައި ވަނީ ޝާހީނަށް މަސްއޫދު ވަޅިން ހަމަލާދިނީ މެރުމުގެ ގަސްދު އޮވެގެންކަން އެއްވެސް ޝައްކެއް ނެތް މިންވަރަށް ސާބިތުވާ ކަމަށެވެ.
އެ މައްސަލައިގައި ޝާހީންގެ ވާރިސުން ބޭނުންވަނީ މަރުގެ ދިޔަ ކަމަށް އެ މީހުން ބުނާތީ، އުމުރަށް ޖަލަށްލުމާއެކު މަރުގެ ދިޔައިގެ ގޮތުގައި 1.25 މިލިއަން ރުފިޔާ އެއް އަހަރު ތެރޭގައި ސިވިލް ކޯޓަށް ދެއްކުމަށް ހުކުމްކުރީ ކަމަށް ވެސް ހުކުމުގައިވެއެވެ. އަދި ކައްފާރާގެ ގޮތުގައި ޖެހިޖެހިގެން 60 ދުވަހު ރޯދަހިފުމަށް ވެސް ހުކުމުގައި މަސްއޫދަށް ނަސޭހަތްތެރިވެފައިވެއެވެ.
