އިންޑިއާ ސިފައިން އަރާނީ ހަމައެކަނި ދިވެހި މަސް ދޯންޏަކަށް ނޫން ކަމަށާއި، އިންޑިއާ ސިފައިން އެންމެ ފަހުން މާލެވެސް އަރާނެކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އިންޑިއާ ސިފައިން ރާއްޖޭގެ މަސް ދޯންޏަކަށް ހަތިޔާރާއެކު އެރި ވީޑިއޯތަކެއް އާންމު ވެފައިވަނިކޮށް ނަޝީދު ޓޫރިޒަމް އިންޑަސްޓްރީ މޯލްޑިވްސް ނަމަކަށް ކިޔާ ވަޓްސްއަޕް ގްރޫޕަށް ފޮނުވި މެސެޖެއްގައި ވަނީ، “އަސްލަށް ވިސްނުމަށާއި އަދި ނިދިން ހޭލަން ޖެހޭކަމަށް” ވިދާޅުވެފައެވެ.
ރައީސް ނަޝީދުގެ ވަޓްސްއަޕް މެސެޖުތަކުގައި އިތުރަށް ވިދާޅުވީ، އިންޑިއާގެ ވެރިކަމުގައި ކޮންމެ ޕާޓީއެއް އޮތްނަމަވެސް، އިންޑިއާގެ ބޭރުގައި އޮތް މިނިވަން ދައުލަތެއްގެ ގޮތުގައި ދިވެހިރާއްޖެ ދެމިއޮވެފައިވާ ކަމުގައެވެ. އަދި ރާއްޖެ އެގޮތުގައި ދެމިއޮތީ ބާރުގެ ބޭނުންކޮށްގެން ނޫންކަމަށާއި، އަދި އެއީ ވަތަނީ ވިސްނުން އިސްކޮށްގެންވެސް ނޫންކަމުގައި ރައީސް ނަޝީދު ވިދާޅުވިއެވެ.
އަދި ދިވެހި ރުފިޔާގެ ހިފަހައްޓާފައި އޮތް ޑޮލަރުގެ އަގު ދޫކޮށްލަން ޖެހޭ ކަމަށާއި، ޗައިނާއަށް އިންޑިއާ ކަޑުގެ ފުނާއި ހަމައަށް ދިއުމަށް އަދި 30 އަހަރު ނަގާނެ ކަމަށް ރައީސް ނަޝީދު ބުނެފައިވެއެވެ.
ރާއްޖޭގެ ކަނޑުގެ ސަރަހައްދުގައި މަސްވެރިކަން ކުރަމުންދިޔަ އަސުރުމާ3، ނިރު7 އަދި މާހޯރަ3 މި ތިން ދޯންޏަށް އިންޑިއާގެ ދެ ކޯސްޓްގާޑް ކައިރިކޮށް ސިފައިން އަރާފައިވާ އިރު، އެ ދޯނިތަކުގައި ހަތިޔާރާއެކު ބޭރުގެ ސިފައިން ހަރަކާތްތެރިވާ މަންޒަރު ފެންނަ ވީޑިއޯތައްވެސް މިހާރު ދަނީ ދައުރުވަމުންނެވެ.
