މި ހިނގާ އޮކްޓޫބަރު މަހުގެ 12 އިން 18 އަށް ހުށަހެޅުނު ސްކޭމް މައްސަލަތަކުގައި މީހުންނަށް ގެއްލުނު ފައިސާގެ ތެރެއިން ގާތްގަނޑަކަށް 43 އިންސައްތަ ފައިސާ އަނބުރާ ހޯދައިދީފައިވާ ކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ.
ފުލުހުން އާންމުކޮށްފައިވާ ތަފާސްހިސާބުތަކަށް ބަލާއިރު، ފާއިތުވި ހަފުތާގައި ސްކޭމްގެ ޖުމުލަ 41 މައްސަލައެއް ވަނީ ހުށަހަޅާފައެވެ. މި މައްސަލަތަކުގައި ޖުމުލަ 496,383.50 (ހަތަރުލައްކަ ނުވަދިހަ ހަހާސް ތިންސަތޭކަ އަށްޑިހަ ތިން ރުފިޔާ ފަންސާސް ލާރި) ގެއްލިފައިވާ އިރު، އޭގެ ތެރެއިން 211,684.50 (ދެލައްކަ އެގާރަ ހަހާސް ހަސަތޭކަ އަށްޑިހަ ހަތަރު ރުފިޔާ ފަންސާސް ލާރި) ވަނީ ރިކަވާކޮށްދެވިފައެވެ.
ފުލުހަށް ހުށަހެޅުނު މައްސަލަތަކުގެ ތަފްސީލަށް ބަލާއިރު، އެންމެ ގިނައީ އީ-ކޮމާސް ނުވަތަ އޮންލައިން ވިޔަފާރީގެ ތެރެއިން ހިންގާފައިވާ ސްކޭމްތަކެވެ. މި ބާވަތުގެ 21 މައްސަލައެއް މިދިޔަ ހަފުތާގައި ރިޕޯޓްކޮށްފައިވެއެވެ. މީގެ އިތުރުން:
- އެހެން މީހެއްގެ ކަންފަތްދޫކޮށް (އިމްޕާސަނޭޝަން) ހިންގި 9 މައްސަލަ
- ކަރަންސީ އެކްސްޗޭންޖް ނުވަތަ ޑޮލަރު މާރުކުރުމުގެ 3 މައްސަލަ
- ފިޝިން، ވިޝިން އަދި ވަޒީފާގެ ފުރުސަތު ދައްކައިގެން ހިންގި 1 މައްސަލަ
- އެހެނިހެން ބާވަތުގެ ސްކޭމްތަކުގެ 8 މައްސަލަ ހިމެނެއެވެ.
ފުލުހުން ފާހަގަކުރި ގޮތުގައި މި ސްކޭމްތައް ހިންގުމަށް ސްކޭމަރުން ބޭނުންކޮށްފައިވަނީ ވައިބާ، ވަޓްސްއެޕް އަދި މެސެންޖާ ފަދަ މެސެޖިންގ ޕްލެޓްފޯމްތަކުގެ އިތުރުން އައިބޭ، ފޭސްބުކް މާކެޓްޕްލޭސް އަދި ސީދާ ފޯން ކޯލްތަކެވެ. އަދި އޮޅުވާލައިގެން ފޮނުވާ ނުދަންނަ ލިންކުތައް މެދުވެރިކޮށް ވެސް ގިނަ ބަޔަކު ސްކޭމްގެ ޝިކާރައަކަށް ވެފައިވެއެވެ.
މިފަދަ ޖަރީމާތަކުން ރައްކާތެރިވުމުގެ ގޮތުން، އޮންލައިންކޮށް ވިޔަފާރިކުރާއިރު ތަކެތި ލިބުމުގެ ކުރިން ފައިސާ ނުދެއްކުމަށާއި، ބޭންކު ނުވަތަ ސަރުކާރުގެ އެއްވެސް އިދާރާއަކުން ގުޅާފައިވާ ކަމަށް ބުނި ކަމުގައިވިޔަސް އޯ.ޓީ.ޕީ (OTP) އަދި ޕިން ނަންބަރު ފަދަ ސިއްރު މައުލޫމާތު ހިއްސާ ނުކުރުމަށް ފުލުހުން ވަނީ އިލްތިމާސްކޮށްފައެވެ.
މީގެ އިތުރުން، ސްކޭމެއް ހިނގައިފިކަމަށް ޝައްކުކުރެވޭ ނަމަ ނުވަތަ ލާރި ކެނޑިއްޖެ ނަމަ، ލަސްނުކޮށް ފުލުހުންނަށް ރިޕޯޓް ކުރުމަކީ ގެއްލުނު ފައިސާ އަނބުރާ ހޯދުމަށް އޮތް އެންމެ ބޮޑު ފުރުސަތު ކަމުގައި ވެސް ފުލުހުންގެ ޚިދުމަތުން ފާހަގަކުރެއެވެ.
