ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ސެކްރެޓަރީ ޖެނެރަލްގެ މަޤާމަށް އަލްއުސްތާޛު މޫސާ ފަތުޙީ އާދަމް މިއަދު އައްޔަނުކުރައްވައިފިއެވެ. މި މަޤާމަށް ފަތުޙީ އައްޔަނުކުރެއްވުމާ ގުޅިގެން ޕާޓީގެ ފަރާތުން ވަނީ އޭނާއަށް މަރުޙަބާ ދަންނަވާފައެވެ.
ކޮންގްރެސް ޕާޓީގެ ސެކްރެޓަރީ ޖެނެރަލްގެ މަޤާމަށް އަލްއުސްތާޛު މޫސާ ފަތުޙީ އާދަމް އައްޔަނު ކުރެއްވުމާ ގުޅިގެން، އެމަނިކުފާނަށް އިޚްލާޞްތެރި ތަހުނިޔާއައި މަރުޙަބާއެއް ދަންނަވަން.#DhiveheengeRaajje#CongressPartyMV pic.twitter.com/55TdhEr6Hb
— PNC Secretariat (@pnc_secretariat) April 20, 2026
މޫސާ ފަތުޙީ އަކީ ސިޔާސީ ދާއިރާގައި ގިނަ ދުވަސްތަކެއް ވަންދެން މަސައްކަތް ކުރައްވާފައިވާ، ތަޖުރިބާކާރު ބޭފުޅެކެވެ. މި މަޤާމަށް އައްޔަންކުރެއްވުމުގެ ކުރިން ފަތުހީ ހުންނެވީ ހޯމް މިނިސްޓްރީގެ ޑެޕިއުޓީ މިނިސްޓަރުގެ މަާމުގައެވެ. މީގެ އިތުރުން، އޭނާ ވަނީ ލޯކަލް ގަވަރމަންޓް އޮތޯރިޓީ (އެލްޖީއޭ) ގެ މެންބަރުކަމާއި، އަތޮޅު ކައުންސިލްގެ ރައީސްކަން ފަދަ މުހިންމު މަޤާމުތައް ވެސް ފުރުއްވާފައެވެ.
ފަތުޙީ މި މަޤާމަށް އައްޔަނުކުރައްވާފައިވަނީ، އެ މަޤާމުގައި ކުރިން ހުންނެވި މުޢާޒް ހަލީމް އެމަޤާމުން އިސްތިއުފާ ދެއްވުމާ ގުޅިގެންނެވެ.
މަޤާމުން އިސްތިއުފާ ދެއްވިކަން އިޢުލާން ކުރައްވަމުން މުޢާޒް ވިދާޅުވީ، ޕާޓީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޕާޓީގެ ހިންގުން ހަރުދަނާކުރައްވައި، ރައްޔިތުންގެ ވިންދާ އެއްގޮތަށް މަސައްކަތްތައް ބައްޓަންކުރެއްވުމަށް ފައްޓަވާފައިވާ މަސައްކަތްޕުޅުތަކަށް ފުރިހަމަ އެއްބާރުލުން ދެއްވަން ބޭނުންފުޅުވާ ކަމަށެވެ. އަދި ސެކްރެޓަރީ ޖެނެރަލްގެ މަޤާމަކީ ފުރިހަމައަށް ވަގުތު ދެވޭނެ ބޭފުޅަކު ހުރުން މުހިންމު މަޤާމަކަށްވާތީ، އެ މަޤާމުން އިސްތިއުފާ ދެއްވީ ކަމަށްވެސް އޭނާ ވިދާޅުވިއެވެ.
މުޢާޒް އިސްތިއުފާ ދެއްވުމާ ގުޅިގެން ޕީއެންސީން ވަނީ އޭނާ އެ މަޤާމުގައި ހުންނަވާ އެޕާޓީއަށް ކޮށްދެއްވި ޚިދުމަތްތަކަށް ޝުކުރުއަދާ ކުރައްވާފައެވެ.
