ކުރިއަށް އޮތް ރިޔާސީ އިންތިހާބުގައި އެމްޑީޕީގެ ރިޔާސީ ކެންޑިޑޭޓަކަށް އެ ޕާޓީގެ ކުރީގެ ޗެއަރޕާސަން ފައްޔާޒް އިސްމާއީލް ހަމަޖައްސަވައި، އެމްޑީޕީގެ ރިޔާސީ ޓިކެޓް ފައްޔާޒަށް ދިނުމަށް ތާއީދުކުރައްވާ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ނަޝީދު މި މޭރުމުން ވިދާޅުވީ ”ބޮޑު ބަދަލު“ ގެ ނަމުގައި ނަޝީދާއި ފައްޔާޒް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. މި ބައްދަލުވުމުގައި ވާހަކަދައްކަވަމުން ނަޝީދު ވިދާޅުވީ، ދައުލަތުގެ އެންމެ އިސްވެރިޔަކަށް ފައްޔާޒް އިސްމާއިލް ގެންނަން ތާއީދުކުރައްވާ ކަމަށެވެ.
”މި ބޮޑު ބަދަލުތައް ގެނައުމަށްޓަކައި އަޅުގަނޑު ތާއީދު ކުރަން ފައްޔާޒް އިސްމާއީލް އެއީ ސަރުކާރުގެ އެންމެ މަތީވެރިޔާގެ ގޮތުގައި ކުރިމަތިލުމަށް,“ – ނަޝީދު ވިދާޅުވިއެވެ.
ސަރުކާރުގެ އެންމެ މަތީވެރިޔާ ކަމަށް ފައްޔާޒް ގެނައުމަށް ތާއީދުކުރެއްވި ނަމަވެސް، ދައުލަތުގެ އެންމެ މަތީ ވެރިއަކަށް ހުންނެވުމަށް ޝައުގުވެރިވެ ވަޑައިގަންނަވާ ކަމަށް ނަޝީދު ވަނީ ވިދާޅުވެފައެވެ.
މީގެ އިތުރުން ނަޝީދު ވަނީ އެމްޑީޕީގެ ޗެއަރޕާސަން ކަމުގެ މަގާމަށް ކުރިމަތިލައްވަން ނިންމަވާފައިވާކަން ހާމަކުރައްވައިފައެވެ. ނަޝީދު ވިދާޅުވީ އެމްޑީޕީގެ ޗެއަރޕާސަން ކަމުގެ މަގާމަށް ކުރިމަތިލައްވަން ނިންމެވީ ރާއްޖެއަށް ސިޔާސީ ގޮތުން ބޮޑެތި ބަދަލުތަކެއް ގެނައުމަށް ކަމަށެވެ.
