އިދިކޮޅު އެންމެ ބޮޑު ސިޔާސީ ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަންގެ މަގާމަށް ކުރިމަތިލައްވަން ކުރީގެ ރައީސް މުހައްމަދު ނަޝީދު ނިންމަވައިފިއެވެ.
މިކަން އެމަނިކުފާނު ރަސްމީކޮށް ހާމަކުރެއްވީ ”ބޮޑު ބަދަލު“ މި ނަމުގައި މިއަދު ރައީސް ނަޝީދާއި އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް ބޭއްވެވި ޚާއްސަ ނޫސްވެރިންގެ ބައްދަލުވުމެއްގައެވެ. ނޫސްވެރިންނާ ވާހަކަފުޅު ދައްކަވަމުން ރައީސް ނަޝީދު ވިދާޅުވީ، އެމްޑީޕީގެ ޗެއާޕާސަންގެ މަގާމަށް ކުރިމަތިލައްވަން މިހާރު ނިންމަވާފައިވާ ކަމަށެވެ.
ރައީސް ނަޝީދު ވިދާޅުވި ގޮތުގައި އެ މަގާމަށް ކުރިމަތިލެއްވުމަށް ނިންމެވީ ޕާޓީގެ ކަންކަން އިސްލާހުކޮށް، އަލުން ރަނގަޅު މިސްރާބަކަށް ގެންދެވޭނީ އެ މަގާމުގައި ހުންނަވައިގެން ކަމަށް ގަބޫލުފުޅު ކުރެއްވޭތީއެވެ. މީގެ އިތުރުން، އެފްރިކާގައި ބައިނަލްއަގުވާމީ މުހިންމު މަގާމެއްގައި ހުންނެވުމަށްފަހު، އެ މަގާމު ދޫކޮށްލައްވައި ރާއްޖެ ވަޑައިގަތީވެސް ސީދާ އެ ބޭނުންފުޅުގައި ކަމަށް އެމަނިކުފާނު ފާހަގަކުރެއްވިއެވެ.
ރައީސް ނަޝީދުގެ މި ނިންމެވުމާއެކު، އެމަނިކުފާނުގެ އަރިހުގައި މި ބައްދަލުވުމުގައި އިންނެވި ކުރީގެ ޗެއާޕާސަން ފައްޔާޒް އިސްމާއީލް ވަނީ ނަޝީދަށް ފުރިހަމައަށް ތާއީދު ކުރައްވާކަން ހާމަކުރައްވާފައެވެ. ފައްޔާޒް ވިދާޅުވީ އެމްޑީޕީގެ ކުރިމަގަށްޓަކައި ޗެއާޕާސަންގެ މަގާމަށް ނަޝީދު ގެންނެވުމަށް އޭނާގެ ފުރިހަމަ ތާއީދާއި އެއްބާރުލުން އޮންނާނެ ކަމަށެވެ.
ރައީސް ނަޝީދަކީ އެމްޑީޕީގެ ތާރީޚުގައި އެ ޕާޓީގެ ފުރަތަމަ އިންތިޚާބީ ޗެއާޕާސަންގެ މަގާމު ފުރުއްވި ބޭފުޅާވެސް މެއެވެ. އެންމެ ފަހުން އެ މަގާމުގައި ހުންނެވި ފައްޔާޒް އިސްމާއީލް މަގާމުން އިސްތިއުފާ ދެއްވުމާ ގުޅިގެން، މިހާރު ވަގުތީ ގޮތުން ޗެއާޕާސަންގެ މަގާމުގެ މަސްއޫލިއްޔަތުތައް އަދާކުރައްވަމުން ގެންދަވަނީ އަބްދުލްޣަފޫރު މޫސާއެވެ.
