”ބިންވެރިޔާ“ ސްކީމްގެ ދަށުން ގުޅީފަޅުން މިހާތަނަށް 160 އަށްވުރެ ގިނަ ގޯތި ހަވާލުކޮށްފައިވާކަމަށް ހައުސިންގ މިނިސްޓްރީން ހާމަކޮށްފިވެ.
ގުޅީފަޅުން އަލުން ގޯތި ހަވާލުކުރުމުގެ މަސައްކަތް ފަށާފައިވަނީ، އެތަނުގެ ލޭންޑް ޔޫސް ޕްލޭނަށް ބޮޑެތި ބަދަލުތަކެއް ގެނައުމަށްފަހުގައެވެ. ގުޅީފަޅުގެ ލޭންޑް ޔޫސް ޕްލޭނަށް އެހައި ބޮޑު ބަދަލެއް ގެނެސްފައިމިވަނީ، ކުރިއަށް އޮތްތަނުގައި އެތަނުގައި ދިރިއުޅޭނެ އާބާދީއަށް އެކަށީގެންވާ ހިދުމަތްތަކެއް ގާއިމުކުރުމުގެ ގޮތުންނެވެ.
ގުޅީފަޅުން ބިން ލިބުނު މީހުންނަށް ގޯތި ލިބޭ ސަރަހައްދާއި ޕްލޮޓް ކަނޑައެޅުމަށް، އާ ލޭންޑް ޔޫސް ޕްލޭނާއި އެއްގޮތަށް މިހާރު ވަނީ ގުރުއަތު ނަގައިފައެވެ. މީގެ އިތުރުން އެއްބަސްވުމުގައި ސޮއިކުރުމާއި، ރަޖިސްޓްރީ ހަވާލުކުރުމުގެ އިތުރުން ބިން ހަވާލުކުރުމުގެ މަސައްކަތް ވެސް މިހާރު އަންނަނީ ހަލުވި ދުވެލީގައި ކުރަމުންނެވެ. އެގޮތުން މިހާތަނަށް ޖުމުލަ 2،972 ފަރާތަކާއިއެކު ގޯތީގެ އެއްބަސްވުމުގައި ސޮއިކޮށް، ރަޖިސްޓްރީ ހަވާލުކުރުމުގެ މަސައްކަތް ކުރެވިފައިވާކަމަށް ހައުސިން މިނިސްޓްރީން ވަނީ މައުލޫމާތު ދީފައެވެ. އެއާއިއެކު 169 ފަރާތަކަށް ގޯތި ވަނީ ހަވާލުކުރެވިފައެވެ.
ގުޅީފަޅުން ޖުމުލަ ހަތް ސައިޒެއްގެ ގޯތި ދޫކުރުމަށްވަނީ ހަމަޖެހިފައެވެ. އޭގެތެރޭގައި، 1،250 އަކަފޫޓާއި 3،650 އަކަފޫޓާއި ދެމެދުގެ ސައިޒުގެ ގޯތިތައް ހިމެނެއެވެ.
ގުޅިފަޅުން ދޫކުރާ ގޯތިތަކުގެ ތަފްސީލް:
- 1،250 އަކަފޫޓުގެ 669 ގޯތި
- 1،650 އަކަފޫޓުގެ 1،234 ގޯތި
- 2،050 އަކަފޫޓުގެ 916 ގޯތި
- 2،450 އަކަފޫޓުގެ 473 ގޯތި
- 2،850 އަކަފޫޓުގެ 158 ގޯތި
- 3،250 އަކަފޫޓުގެ 49 ގޯތި
- 3،650 އަކަފޫޓުގެ 21 ގޯތި
ގުޅީފަޅުން ގޯތި ހަވާލުކުރުމުގެ މަސައްކަތް ކުރަމުންއަންނައިރު، އެ ސަރަހައްދު ތަރައްގީކުރުމަށް ގިނަ މަސައްކަތްތަކެއް ސަރުކާރުން އަންނަނީ ކުރަމުންނެވެ. އެގޮތުން މަގުތައް ތަރައްގީކުރުމާއި، ފެނާއި ނަރުދަމާ ގާއިމްކުރުމަށް ބޭނުންވާ ވަސީލަތްތައް ތަރައްގީކުރުމަށް މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އަށް މިހާރު ވަނީ ހަވާލުކޮށްފައެވެ.
