ވޭތުވެދިޔަ 18 އަހަރު ދުވަހު ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ބޮޑު ތާޢީދެއް އޮތް ތޮއްޑޫ ދާއިރާގެ ސިޔާސީ މަންޒަރު ބަދަލުވެ، ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން އެ ދާއިރާގެ މުހިންމު ގޮނޑިތަކެއް ކާމިޔާބުކޮށްފިއެވެ.
އިލެކްޝަންސް ކޮމިޝަނުން ހާމަކޮށްފައިވާ ވަގުތީ ނަތީޖާތަކުން ދައްކާ ގޮތުގައި، މި ދާއިރާގައި ހިމެނޭ ތޮއްޑޫ، އުކުޅަސް އަދި ރަސްދޫގެ ކައުންސިލް ރައީސުން ހޮވުމަށް ބޭއްވި އިންތިޚާބުތަކުގައި ޕީއެންސީގެ ކެންޑިޑޭޓުން ވަނީ އެމްޑީޕީގެ ކެންޑިޑޭޓުންގެ މައްޗަށް ބޮޑު ކާމިޔާބީއެއް ހޯދާފައެވެ. މިއީ ގިނަ އަހަރުތަކެއް ވަންދެން އެމްޑީޕީގެ ބާރުގަދަ ކިއްލާއެއްގެ ގޮތުގައި އޮތް މި ދާއިރާއިން އެ ޕާޓީގެ ”ރީނދޫކުލަ“ ފޮހެވިގެންދިޔަ ތާރީޚީ ނަތީޖާއެއްގެ ގޮތުގައި ޕީއެންސީން ސިފަކުރެއެވެ.
ތޮއްޑޫ ކައުންސިލް ރައީސް:
ތޮއްޑޫ ކައުންސިލްގެ ރައީސްކަމަށް ޕީއެންސީގެ ފަރާތުން ވާދަކުރެއްވި އާދަމް ނަވީން ވަނީ 624 ވޯޓު (51.49 އިންސައްތަ) ހޯއްދަވައިގެން ގޮނޑި ކާމިޔާބު ކުރައްވާފައެވެ. އޭނާއާ ވާދަކުރެއްވި އެމްޑީޕީގެ ކެންޑިޑޭޓް ހަސަން ނަސީފަށް ލިބިވަޑައިގަތީ 588 ވޯޓު (48.5 އިންސައްތަ) އެވެ.
އުކުޅަހު ކައުންސިލް ރައީސް:
އުކުޅަހު ކައުންސިލްގެ ރައީސްކަމުގެ ގޮނޑި ޕީއެންސީގެ ކެންޑިޑޭޓް އަލީ ވަހީދު ކާމިޔާބު ކުރެއްވީ 386 ވޯޓު (55.30 އިންސައްތަ) ހޯއްދަވައިގެންނެވެ. އެމްޑީޕީގެ ފަރާތުން ވާދަކުރެއްވި ޝައުކަތު އިބްރާހިމަށް ލިބިވަޑައިގަތީ 312 ވޯޓު (44.70 އިންސައްތަ) އެވެ.
ރަސްދޫ ކައުންސިލް ރައީސް:
ރަސްދޫ ކައުންސިލްގެ ރައީސްކަން ވެސް ކާމިޔާބު ކުރީ ޕީއެންސީންނެވެ. އެ ޕާޓީގެ ކެންޑިޑޭޓް އަހުމަދު ވަހީދު 388 ވޯޓު (50.26 އިންސައްތަ) ހޯއްދެވި އިރު، އެމްޑީޕީގެ ކެންޑިޑޭޓް މުހައްމަދު ޝަފީގަށް ލިބިވަޑައިގަތީ 328 ވޯޓު (42.49 އިންސައްތަ) އެވެ.
މި ކާމިޔާބީއާ ގުޅިގެން ޕީއެންސީން ވަނީ ކާމިޔާބު ހޯއްދެވި ކެންޑިޑޭޓުންނަށާއި އެ ދާއިރާގެ ރައްޔިތުންނަށް މަރުޙަބާ ދެންނެވުމުގެ ގޮތުން ކުލަގަދަ ޙަފްލާއެއް ބާއްވާފައެވެ. ރައީސް ޑރ. މުޢިއްޒުގެ ދެކަނބަލުންވެސް ބައިވެރިވެ ވަޑައިގެންނެވި މި ޙަފްލާގައިވަނީ ހަވާވެސް އަރުވާފައެވެ.
ރައީސް ޑރ. މުޢިއްޒުގެ ސަރުކާރަށް ރައްޔިތުން ކުރާ އިތުބާރު މި ނަތީޖާއިން ހާމަވާ ކަމަށް އެ ޕާޓީން ބުނެއެވެ. 18 އަހަރަށް ފަހު މި ދާއިރާގެ ސިޔާސީ މިސްރާބު ބަދަލުވުމަކީ، ރާއްޖޭގެ ސިޔާސީ މަޝްރަހަށް އައި ބޮޑު ބަދަލެއްގެ ގޮތުގައި ފާހަގަކުރެވެއެވެ.
