ޅ. އަތޮޅުގެ ފަޅުރަށަކުން ފެނުނު ކިނބުލެއް، އެމްއެންޑީއެފް ނޮދަން އޭރިއާ ކޮމާންޑްގެ ސިފައިންގެ ބެލުމުގެ ދަށަށް ގެންގޮސްފިއެވެ.
އެމްއެންޑީއެފުން މަޢުލޫމާތު ދީފައިވާ ގޮތުގައި، ޅ. އަތޮޅުގެ ފަޅުރަށަކުން މި ކިނބޫ ފެނިގެން އުޅޭކަމުގެ މަޢުލޫމާތު ލިބުމާއެކު، އެމްއެންޑީއެފް ނޮދަން އޭރިއާ ކޮމާންޑްގެ ކޯސްޓްގާޑް ސިފައިން ވަނީ އެ ސަރަޙައްދަށް ގޮސް ހަރަކާތްތެރިވެފައެވެ. އަދި އެ ރަށުން ފެނުނު ކިނބޫ ހިފުމަށްފަހު، މިހާރު ވަނީ ޅ. ނައިފަރަށް ގެންގޮސްފައެވެ.
މި ކިނބުލުގެ ދިގުމިނުގައި ގާތްގަނޑަކަށް 5 ފޫޓު ހުރިކަމަށް އެމްއެންޑީއެފުން ބުނެއެވެ. މި ހާދިސާ ހިނގާފައިވަނީ މިއަދުގެ ވަގުތެއްގައެވެ.
ރާއްޖޭގެ އެކި ސަރަޙައްދުތަކުން ދޭތެރެއަކުން ކިނބޫ ފެންނަމުންދާތީ، މޫދަށް އެރި އުޅުމުގައާއި ދަތުރުފަތުރު ކުރުމުގައި އާންމުން ސަމާލުވުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ. ކިނބޫ ފެނިއްޖެ ނަމަ، ލަސްނުކޮށް އެމްއެންޑީއެފްގެ ހިލޭ ގުޅޭ ނަންބަރު 191 އަށް ގުޅައި މަޢުލޫމާތު ހިއްސާކުރުމަށްވެސް ވަނީ އެދިފައެވެ.
