މި މަހުގެ ހަތަރު ވަނަ ދުވަހު ބޭއްވި ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިހާބުގައި ވެރިކަން ކުރާ މައި ޕާޓީ ޕީއެންސީއަށް ލިބުނު ކާމިޔާބީއާއި ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އއ. ރަސްދޫއަށް ވަޑައިގެންފިއެވެ.
ރައީސްގެ މި ދަތުރުފުޅަކީ، ކައުންސިލް އިންތިހާބަށް ފަހު އެމަނިކުފާނު އަތޮޅުތެރެއަށް ކުރައްވާ ފުރަތަމަ ދަތުރުފުޅެވެ. ރައީސް މުޢިއްޒު ރަސްދޫއަށް ވަޑައިގަތުމާއިއެކު އެ ރަށުގެ ރައްޔިތުން ވަނީ އެމަނިކުފާނަށް ވަރަށް ހޫނު މަރުހަބާއެއް ދަންނަވައިފައެވެ.
މި ދަތުރުފުޅުގައި ރައީސްގެ އަރިހުގައި ސަރުކާރުގެ ގިނަ ވަޒީރުން ބައިވެރިވެވަޑައިގެންފައިވެއެވެ.
ރަސްދޫއަކީ އިދިކޮޅު އެމްޑީޕީއަށް ތާއީދު ބޮޑު ރަށެއްގެ ގޮތުގައި މީގެކުރިން ފާހަގަކުރެވިގެން ގޮސްފައިވާ ރަށެކެވެ. ނަމަވެސް މި ފަހުން ބޭއްވުނު އިންތިހާބުގައި ޕީއެންސީން ވަނީ އެ ރަށުގެ ހުރިހާ ގޮނޑިތަކެއް ހެން ބޮޑު ތަފާތަކުން ކާމިޔާބުކޮށްފައެވެ. އެގޮތުން ކައުންސިލްގެ ހުރިހާ ގޮނޑިއެއް ޕީއެންސީ ކެންޑިޑޭޓުން ކާމިޔާބުކޮށްފައިވާއިރު، އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އެންމެ ގޮނޑިއެއް ފިޔަވައި ހުރިހާ ގޮނޑިއެއް ޕީއެންސީގެ ކެންޑިޑޭޓުން ވަނީ ކާމިޔާބުކޮށްފައެވެ.
މިކާމިޔާބީ ފާހަގަކުރުމުގެ ގޮތުން ވަނީ ހަވާވެސް އަރުވާފައެވެ.
މީގެ އިތުރުން، އިންތިހާބަކާއި ހަމައަށް ދިއުމެއް ނެތި ގިނަ ގޮނޑިތަކެއް ޕީއެންސީއަށް ލިބިފައިވާކަން ފާހަގަކޮށްލެވެއެވެ.
