ލުބުނާނުގައި އިޒްރޭލުގެ އިސްތިއުމާރުން ކުރަމުންދާ ހަނގުރާމައިގެ ޙަޤީޤީ މަޤްޞަދު މުޅި ދުނިޔެއަށް ހާމަވެއްޖެއެވެ. އިޒްރޭލުގެ މީޑިއާތަކުން ކަށަވަރުކޮށްދޭ ގޮތުގައި، ލުބުނާނުގެ ދެކުނުގައި ”ޔެލޯ ލައިން“ ގެ ނަމުގައި އައު ސިޔާސަތެއް ތަންފީޒުކޮށް، އެ ސަރަޙައްދަކީ ޣައްޒާއެކޭ އެއްފަދައިން ބަންދުކޮށްފައިވާ ”ސެކިއުރިޓީ ބަފަރ ޒޯނެއް“ ކަމުގައި މިވަނީ ކަނޑައަޅާފައެވެ.
”ޔެލޯ ލައިން“ އިން އެތެރެވާ މީހުންނަށް އިޒްރޭލުން ޙަމަލާދޭން ފަށައިފި
ލުބުނާނުގައި ހައްދުފަހަނައަޅާފައިވާ ޔަހޫދީ އިޒްރޭލުން ހިންގާ ބިން ފޭރިގަތުމުގެ ޖަރީމާ މިވަނީ އިތުރަށް ފުޅާކޮށްފައެވެ. 10 ދުވަހުގެ ”ސީސްފަޔަރ“ އަށް ޢަމަލުކުރަން ފެށިތާ މަދު ގަޑިއިރުކޮޅެއްގެ ތެރޭގައި، އިޒްރޭލުގެ އަސްކަރިއްޔާއިން ވަނީ ލުބުނާނުގެ ދެކުނުގައި އެމީހުން ކަނޑައެޅި ”ޔެލޯ ލައިން“ އާ ގާތްވި މީހުންނަށް ޙަމަލާދީ މަރާލާފައިވާކަން ރަސްމީކޮށް އިޢުލާންކޮށްފައެވެ. މިއިން ސާބިތުވަނީ ޙަމަލާ ހުއްޓާލުމުގެ އެއްބަސްވުމަކީ ހަމައެކަނި ލުބުނާނުގެ ބިންތައް ދާއިމީކޮށް ފޭރިގަތުމަށް ބޭނުންކުރާ އޮޅުވާލުމެއް ކަމެވެ.
ލިޠާނީ ކޯރާ ހަމައަށް ބިން ފޭރިގަތުން
އިޒްރޭލުގެ ނިރުބަވެރި ބޮޑުވަޒީރު ނަތަންޔާހޫ ވަނީ މި ބަފަރ ޒޯން ލިޠާނީ ކޯރާ ހަމައަށް ފުޅާކުރާނެކަން އިޢުލާންކޮށްފައެވެ. އަދި ލުބުނާނުގެ ދެކުނު އެއްކޮށް ވަކިކޮށްލުމަށްޓަކައި، ލިޠާނީ ކޯރު މަތީގައިވާ މުހިންމު ބްރިޖުތައް އިޒްރޭލުން ދަނީ ގަސްތުގައި ގޮއްވާލަމުންނެވެ.
ނަސްލު ނައްތާލުމާއި ގެދޮރު ފޭރުން
ސަލާމަތީ ރިޕޯޓުތައް ބުނާގޮތުން އިޒްރޭލުން ފޭރިގަނެފައިވާ ސަރަޙައްދަކީ 50 ރަށް ހިމެނޭގޮތަށް، ލުބުނާނުގެ ޖުމްލަ ބިމުގެ %10 އެވެ. ލުބުނާނުގެ ޑިފެންސް މިނިސްޓްރީއިން ބުނެފައިވަނީ މިއީ ރައްޔިތުން ގަދަކަމުން ގެދޮރުން ބޭރުކޮށް، ދެކުނު ލުބުނާނު އެއްކޮށް އިސްތިއުމާރުކުރުމުގެ ރޭވުމެއް ކަމަށެވެ. ގެދޮރުން ނެރެލެވުނު މިލިއަނަކަށްވުރެ ގިނަ މީހުންނަށް ދެން އެމީހުންގެ ވަޒަނަކަށް ނުދެވޭނެކަން މިއަދު މިވަނީ ކަށަވަރުވެފައެވެ.
