ކޮންގްރެސް ޕާޓީގެ ސެކެޓްރީ ޖެނެރަލްގެ މަގާމުން މުއާޒް ހަލީމް އިސްތިއުފާ ދެއްވައިފިއެވެ.
މަގާމުން އިސްތިއުފާދެއްވިކަން ޔަގީންކޮށްދެއްވަމުން އެކްސްގައި ހިއްސާކުރެއްވި ޕޯސްޓެއްގައި މުއާޒް ވިދާޅުވީ، ކޮންގްރެސް ޕާޓީގެ ހިންގުން ހަރުދަނާކުރައްވައި، ރައްޔިތުންގެ ވިންދާ އެއްގޮތަށް ޕާޓީގެ މަސައްކަތްތައް ބައްޓަންކުރައްވައި، ފުރިހަމަ ނަތީޖާ ހާސިލުކުރެވޭ ޕާޓީއަކަށް އެ ޕާޓީ ހެއްދެވުމަށް އެ ޕާޓީގެ ރައީސް، އަދި ރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވާފައިވާ ހަރުދަނާ މަސައްކަތްޕުޅުތަކަށް ފުރިހަމަ އެއްބާރުލުން ދެއްވުމަށް ބޭނުންވާ ކަމަށެވެ.
ޕީޕަލްސް ނެޝަނަލް ކޮންގްރެސް (ކޮންގްރެސް ޕާޓީ) ގެ ހިންގުން ހަރުދަނާކުރައްވައި، ރައްޔިތުންގެ ވިންދާ އެއްގޮތަށް ޕާޓީގެ މަސައްކަތްތައް ބައްޓަންކުރައްވައި، ފުރިހަމަ ނަތީޖާ ޙާޞިލް ކުރެވޭ ޕާޓީއަކަށް ޕާޓީ ހެއްދެވުމަށް ޕާޓީގެ ރައީސް، ރައީސުލްޖުމްހޫރިއްޔާ @MMuizzu ފައްޓަވާފައިވާ ހަރުދަނާ…
— MuazHaleem (@muazhalym) April 18, 2026
އެހެންކަމުން، ޕާޓީގެ ސެކެޓްރީ ޖެނެރަލްގެ މަގާމުގައި އޭނާއަށްވުރެ ފުރިހަމައަށް ވަގުތު ދެވޭނެ ބޭފުޅަކު ހުރުމަކީ މުހިންމު ކަމެއްކަމަށް ދެކެވަޑައިގަންނަވާތީ މިއަދުން ފެށިގެން ކޮންގްރެސް ޕާޓީގެ ސެކެޓްރީ ޖެނެރަލްކަމުގެ މަގާމުން އިސްތިއުފާދެއްވާފައިވާ ކަމަށެވެ.
ކޮންގްރެސް ޕާޓީގެ ސެކެޓްރީ ޖެނެރަލްކަމުގެ މަގާމުން މުއާޒް އިސްތިއުފާދެއްވާފައިވާއިރު ފާހަގަކޮށްލަންޖެހޭ ކަމަކީ، މި މަހުގެ ހަތަރުވަނަ ދުވަހު ބޭއްވުނު ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިހާބުގެ ނަތީޖާއަށް ފަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންދަވަނީ ސަރުކާރު ހިންގެވުމަށް ބޮޑެތި ބަދަލުތަކެއް ގެންނަވަމުންނެވެ. އޭގެ ތެރޭގައި ބައެއް މިނިސްޓްރީތައް އުވާލައްވައި ކެބިނެޓް މިނިސްޓަރުން ވަނީ ބަދަލުކުރައްވައިފައެވެ.
މީގެ އިތުރުން ވެސް ޕާޓީގެ ހިންގުން ހަރުދަނާ ކުރެވޭނެ ގޮތްތައް ބަލައި، ޕާޓީގެ ހިންގުން ހަރުދަނާކުރުމަށް ވެސް ގިނަ މަސައްކަތްތަކެއް އެމަނިކުފާނު އަންނަނީ ކުރައްވަމުންނެވެ.
