އެމެރިކާއާއި އީރާނުގެ ހަނގުރާމަ ފެށުނު ފަހުން ހޮރްމޫޒް ކަނޑުއޮޅި ވެފައިވަނީ މުޅި ދުނިޔޭގެ ލޯތައް އެތަނަކަށް ހުއްޓިފައިވާ ތަނަކަށެވެ. ގޭގެ ފެންޑާތަކުގެ ބޮޑުވާހަކައިން ހެށިގެން ކޮފީމޭޒުތަކުގައި އެއްވެލާ ރައްޓެހިންވެސް އެތަނުގެ ވާނުވާ ބަލައި ފަހުގެ ޚަބަރުތައް ޙިއްޞާކޮށް އުޅެއެވެ.
ހޮރްމޫޒް ކަނޑުއޮޅިއަކީ އޭގެ އުތުރުން އީރާނާއި ދެކުނުން އޮމާނާއި އެކުވެރި ޢަރަބި ދައުލަތްތައް (ޔޫއޭއީ) ދެ ދެމެދުގައިވާ އެންމެ ހަނިހިސާބުގައި 21 މޭލުގެ ފުޅާމިން ހުންނަ ކަނޑުމަގެކެވެ. ދުނިޔޭގެ ތެލާއި ލިކުއިފައިޑް ނެޗުރަލް ގޭހުގެ 20 އިންސައްތަ ދަތުރުކުރާ މި އިސްތިރާޖީ މަގު ގުޅުވައިދެނީ ފާރިސީ ކަނޑާއި އަރަބި ކަނޑަށް ވާސިލުވުމަށް އޮންނަ އޮމާން ކަނޑެވެ.
އެމެރިކާއާއި އީރާނުގެ ދެމެދުގައި ފެށިފައިވާ ހަނގުރާމާގައި އީރާނުން ދަނީ އެމެރިކާއަށް ހަނގުރާމަ ހުއްޓާލުމަށާއި މަޝްވަރާކުރުވުމަށް ފިއްތުންތައް ކުރިމަތިކުރުވުމަށް ހޮރްމޫޒް ކަނޑުއޮޅީގެ ބޭނުން ކުރަމުންނެވެ. އެތަން ބަނދުކުރުމުން ދުނިޔޭގެ ބާޒާރުގައި ތެލާއި ކާބޯތަކެތީގެ އަގުއުފުލުމަކީ އެމެރިކާއަށާއި ޔޫރަޕު އަދި ޖުމްލަގޮތެއްގައި މުޅި ދުނިޔެއަށް އޭގެ އަސަރުކުރާ ކަމަކަށް ވުމުން އެތަން ވެފައިވަނީ އީރާނުގެ އިސްތިރާޖީ ”ޓްރަމްޕު ކާޑަ“ ކަށެވެ.
ކަނޑުއޮޅި އިއްޔެ ހުޅުވާލުން:
ލުބުނާނުގައި އިޒްރޭލާއި ހިޒްބު الله ގެ ދެމެދުގައި ހަނގުރާމަ މަޑުޖައްސައިލުމަށް އެއްބަސްވުމަކަށް އައުމާއިއެކު އިއްޔެ އީރާނުގެ ފޮރިން މިނިސްޓަރު އައްބާސް ޢަރާޤްޗީ ވަނީ އެކަމާއި ވިދިގެން އެމެރިކާއާއި އީރާނުން ހަނގުރާމަ މަޑުޖައްސައިލުމަށް އެއްބަސްވެފައިވާ މުއްދަތައް ހުރިހާ ވިޔަފާރި އުޅަނދުތަކަކަށް ހޮރްމޫޒް ކަނޑުއޮޅި ހުޅުވިފައިވާ ކަމަށް އިޢުލާނުކޮށް ޓުވީޓެއް ކޮށްފައެވެ.
In line with the ceasefire in Lebanon, the passage for all commercial vessels through Strait of Hormuz is declared completely open for the remaining period of ceasefire, on the coordinated route as already announced by Ports and Maritime Organisation of the Islamic Rep. of Iran.
— Seyed Abbas Araghchi (@araghchi) April 17, 2026
އަދި ކަނޑުއޮޅި ހުޅުވާލުމުން އެމެރިކާގެ ރައީސް ޑޮނަލްޑު ޓްރަމްޕުވެސް ވަނީ އެކަން އިޢުލާނުކޮށް، ނަމަވެސް އެމެރިކާއިން ކަނޑުއޮޅި ބަންދުކުރުން ކުރިއެކޭވެސް އެއްގޮތަށް ކުރިއަށް ގެންދާނެކަމަށް ބުނެފައެވެ.
އައު ދުވަހަކަށް ދުނިޔޭ ލޯ ހުޅުވާލީ ހުޒްމޫޒް ކަނޑުއޮޅިން ދަތުރުކުރެވެން ފެށޭނެކަމަށް ލަފާކޮށް ޚަބަރުތަކާއި، އޭގެ ސަބަބުން ދުނިޔޭގެ ބާޒާރުގައި ތެލުގެ އަގަށްވެސް އޭގެ ހެޔޮ އަސަރުތަކެއް ކުރުމާއިވެސް އެކުގައެވެ.
އީރާނުގެ ދާޚިލީ ހަމަނުޖެހުން:
މިއާއެކު މިއަދު މެންދުރު އީރާނުގެ ސްޓޭޓު ނޫހުން އެޤައުމުގެ ޢަސްކަރިއްޔާއާއި ހަވާލާދީ ކުއްލިގޮތަކަށް އިޢުލާނުކޮށްފައިވަނީ އީރާނުން އެއްބަސްވީ “ލިމިޓުކޮށްވައިވާ ޢަދަދަކަށް” މަނަވަރުތަކަށް ދަތުރުކުރަން ހުއްދަދިންކަމަށާއި، ނަމަވެސް އެމެރިކާއިން އެމީހުން އެއްބަސްވި ކަންކަން އަދާނުކުރުމުން އަލުން ހުރްމޫޒް ކަނޑުއޮޅި ބަންދުކޮށްފައިވާ ކަމަށެވެ.
މީގެ އިތުރުން އީރާނުގެ ޢަސްކަރީ ބާރު އެޤައުމުގެ ރިވޮލިއުޝަނަރީ ގާޑްސްގެ ދަށުގައިވާ ”ތަސްނީމް“ ނޫހުންވެސް ވަނީ އެޤައުމުގެ ފޮރިން މިނިސްޓަރު އައްބާސް ޢަރާޤްޗީ ކޮށްފައިވާ ޓުވީޓުގައި މުހިއްމު މަޢުލޫމާތުތައް ހާމަނުކޮށް ވާ ކަމަށް ބުނެ، އެޓުވީޓަށް ފާޑުބުނެފައެވެ.
Wow, IRGC state news agency openly and directly criticises Iranian FM Araghchi not for properly representing the Iranian military’s views on the Hormuz strait https://t.co/M2FEQG0dvH
— Ragıp Soylu (@ragipsoylu) April 18, 2026
އީރާނު ސަރުކާރުގެ ސިޔާސީ ވެރިންނާއި ޢަސްކަރިއްޔާގެ ދެމެދުގައި މިފަދަ ދެބަސްވުންތައް ފާހަގަކުރެވުމަކީ އީރާނުގެ ދާޚިލީކަންކަން ހަލަބޮލިވުމަށް ފުރުސަތު ހުޅުވިގެން ދާނޭ ކަމެއް ކަމަށް މަޝްރަހު ދިރާސާކުރާ ފަރާތްތަކުން ބުނެއެވެ.
