ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލިފައިވީނަމަވެސް ސަރުކާރުން ގެންދަނީ މަސްވެރިންނަށް އެ ތަކުލީފު ނުޖައްސައި ތެލުގެ ކަންކަން މެނޭޖުކުރަމުންކަމަށް ފިޝަރީޒް މިނިސްޓަރު އަޙްމަދު ޝިޔާމް ވިދާޅުވެއްޖެއެވެ.
މިނިސްޓަރު ޝިޔާމް މި މޭރުމުން ވިދާޅުވީ، ތެޔޮ ނުލިބުމުގެ ސަބަބުން މަސްދޯނިފަހަރު މަހަށް ނުފުރި، މަސްވެރިކަން އެއްކޮށް ހުއްޓުމަކަށް އައިސްފައިވާކަމަށް ބުނެ ”ދައުރު“ ނޫހުން ޝާއިއުކޮށްފައިވާ ހަބަރަކާއި ގުޅިގެން އެކަމަށް ރައްދުދެއްވަމުންނެވެ. މިނިސްޓަރު ވިދާޅުވީ، މި އުނދަގޫ ހާލަތުގައި ވެސް ސަރުކާރުން ޔަގީންކުރާ އެއްކަމަކީ ދިވެހި މަސްވެރިން މަސްކަނޑުތަކަށް ނިކުމެވޭނެކަން ކަށަވަރުކުރުން ކަމަށެވެ.
މިއީ ރަނގަޅު ޚަބަރެއްނޫން. މި އުނދަގޫ ހާލަތުގައިވެސް ސަރުކާރުން ޔަޤީންކުރާ އެއްކަމަކީ ދިވެހިމަސްވެރިން މަސްކަނޑުތަކަށް ނިކުމެވޭނެކަން ކަށަވަރުކުރުން. ދުނިޔޭގެ ބާޒާރުގައި ތެލުގެއަގު އެހާމައްޗަށް އަރައިގެންދިޔަނަމަވެސް ދިވެހި މަސްވެެރިންނަށް އެބުރަ ނުޖައްސާ ސަރުކާރުން މިއަދާ… pic.twitter.com/LmXmUxqxEo
— Ahmed Shiyam (@Shiyamaldives) April 18, 2026
”ދުނިޔޭގެ ބާޒާރުގައި ތެލުގެ އަގު އުފުލިގެންދިޔަ ނަމަވެސް ދިވެހި މަސްވެެރިންނަށް އެ ބުރަ ނުޖައްސައި ސަރުކާރުން މިއަދާއި ހަމައަށް ވެސް ގެންދަނީ ތެލުގެ ކަންކަން ވީއެންމެ ރަނގަޅަށް މަނޭޖުކުރަމުން، އަދި އެކަން މަސްވެރިން ވެސް ޝުކުރުވެރިކަމާއިއެކު ބަލައިގަނޭ،“ – މިނިސްޓަރު ޝިޔާމް ވިދާޅުވިއެވެ.
ގިނަ ދުވަސްތަކެއް ވަންދެން އެންވެރިކަން ދަށްވެފައި އޮތުމަށް ފަހު މުޅިރާއްޖެއަށް ވެސް އެންވެރިކަން ރަނގަޅުވާން ފެށުމާއިއެކު މަސްވެެރިކަން ވެސް ރަނގަޅުވަމުން އަންނަކަން ފާހަގަކުރައްވަމުން މިނިސްޓަރު ވިދާޅުވީ، މަސްވެރިކަން ރަނގަޅު ސަރަހައްދުތަކަށް ބޯޓުތައް ފޮނުވުމުގެ މަސައްކަތްތައް ވެސް ކުރެވިގެންދާނެ ކަމަށެވެ.
މިނިސްޓަރު ޝިޔާމް އިތުރަށް ވިދާޅުވީ، މަސްވެރިންގެ ކަންކަން މިހާލަތުގައި ވެސް ވަރަށް ގާތުންބަލައި، މަސްވެރިންނަށް އެންމެ ރަނގަޅު ގޮތްތައް ހޯދައިދިނުމުގެ މަސައްކަތް ކުރަމުން އަންނަ ކަމަށެވެ. އަދި މަސްވެެރިކަމުގެ ސިނާއަތުގައި ހަރަކާތްތެެރިވާ ކުންފުނިތަކަށް ދިމާވެފައިވާ ގޮންޖެހުންތަކަށް ދާއިމީ ހައްލެއް ހޯދައިދިނުމަށް ގިނަ މަސައްކަތްތަކެއް ސަރުކާރުން ކުރަމުން އަންނަ ކަމަށް މިނިސްޓަރު ވަނީ އިތުރަށް ވިދާޅުވެފައެވެ.
