ކުރީ ސަރުކާރުން ނަގާފައިވާ ބޮޑު ލޯނެއް ނުވަތަ ސްކޫކް ދައްކާފައިވަނީ ދައުލަތުގެ އިތުރު އެއްވެސް ހަރުމުދަލެއް ނުވިއްކައި އަދި އިތުރު ދަރަންޏެއް ނުނަގައި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ނިމިިދިޔަ ކައުންސިލް އިންތިޚާބު އަދި އ.ތ.މ ކޮމެޓީތަކުގެ އިންތިޚާބުގައި އއ. ރަސްދޫ ދާއިރާއިން ކޮންގްރެސް ޕާޓީ ހޯދި ކާމިޔާބީ ފާހަގަކުރުމަށް ރަސްދޫގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، މިދިޔަ ސަރުކާރުން ނަގާފައިވާ 524 މިލިޔަން ޑޮލަރުގެ ސްކޫކް މި މަހުގެ 2 ވަނަ ދުވަހު މި ސަރުކާރުން ދައްކާފައިވާ ކަމަށެވެ. އަދި މި ފައިސާ ދެއްކީ ޤައުމު ބަނގުރޫޓުވިޔަ ނުދީ، އިތުރު ހަރުމުދަލެއް ނުވިއްކާ، ސަރުކާރުގެ އަމިއްލަ ހަކަތައިން ކަމަށް އެމަނިކުފާނު ފާހަގަކުރެއްވިއެވެ.
ރައީސް ވިދާޅުވި ގޮތުގައި، މި ސްކޫކް ކުރީ ސަރުކާރުން ނަގާފައިވަނީ ދައުލަތުގެ މުހިންމު 4 ބިމެއް ރަހުނުކޮށްފައެވެ. އޭގެ ތެރޭގައި ހިމެނެނީ:
- ދަރުމަވަންތަ ހޮސްޕިޓަލް
- އިމާރާތްއިސްކަންދަރު ސްކޫލްގެ ބިން
- އައިޖީއެމްއެޗްގެ ބިންފި
- ނޭންސް މިނިސްޓްރީ ހިންގާ ބިން
”މި 4 ތަން ހުރީ ރަހުނުކޮށްފައި. މި ހުރިހައި ތަނެއްވެސް މިހާރު އެ ހުރީ ސަލާމަތްވެފައި،“ ރައީސް ވިދާޅުވިއެވެ.
މީގެ އިތުރުންވެސް ދައުލަތުގެ ބައެއް ތަންތަން ރަހުނުކޮށްފައި އެބަހުރި ކަމަށާއި، އެ ތަންތަން ސަލާމަތްކުރުމުގެ މަސައްކަތްވެސް ސަރުކާރުން ކުރަމުންދާ ކަމަށް އެމަނިކުފާނު ވިދާޅުވިއެވެ.
އިދިކޮޅު ފަރާތްތަކުން މި ސްކޫކް ނުދައްކާ ކަމަށް ބުނެ ދައްކަމުންދާ ވާހަކަތަކަށް ރައްދު ދެއްވަމުން ރައީސް ވިދާޅުވީ، ފައިސާ ދެއްކިކަމުގެ ހުރިހާ ލިޔެކިޔުންތަކެއް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި މާލީ ވުޒާރާގައި ހުންނާނެ ކަމަށެވެ.
ވޭތުވެދިޔަ ދެ އަހަރެއްހާ ދުވަހުގެ ތެރޭގައި ގިނަ އަދަދެއްގެ ދަރަނިތައް ދައްކާފައިވާކަން ފާހަގަކުރައްވައި ރައީސް އިތުރަށް ވިދާޅުވީ، އަތޮޅުތަކުގެ ރަށްރަށުގެ ތަރައްޤީއަށް 4 ބިލިޔަން ރުފިޔާގެ މަޝްރޫއު އެތައް ސަތޭކަ ދިވެހި ކުންފުނިތަކަކާ ހަވާލުކޮށްފައިވާ ކަމަށެވެ. އެ މަޝްރޫޢުތަކުގެ މަސައްކަތްތައްވެސް ބާރުމިނުގައި ކުރިއަށްދާނެ ކަމުގެ ޔަގީންކަން ރައީސް ދެއްވިއެވެ.
