ހާއްސަ އެހީއަށް ބޭނުންވާ ފަރާތްތަކަށް ހާއްސަކޮށްގެން ތަރައްގީކުރާ އެމްޕަވަރމަންޓް ހަބް އަންނަ ޖުލައި މަހުގެ ތެރޭގައި ހުޅުވިގެންދާނެ ކަމަށް ހެލްތް މިނިސްޓްރީން ބުނެފިއެވެ.
ހެލްތް މިނިސްޓްރީން ބުނީ އެމްޕަވަރމަންޓް ހަބަކީ، ރަސްމީ ތައުލީމު ނިންމުމަށް ފަހު މުޖުތަމައުއަށް ނުކުންނަ ހާއްސަ އެހީއަށް ބޭނުންވާ ފަރާތްތަކުގެ ހުނަރު ތަރައްގީކުރުމަށާއި، މަސައްކަތުގެ ތަޖުރިބާއާއި، އިގްތިސާދީ ގޮތުން ފުދުންތެރި ބަޔަކަށް ވުމަށް މަގުފަހިކޮށްދޭނެ ފުރުސަތުތައް ހޯދައިދިނުމުގެ ގޮތުން ތަރައްގީކުރެވިގެންދާ ހަބެއް ކަމަށެވެ.
މި ހަބަކީ ހުޅުމާލެ ދެވަނަ ފިޔަވަހީގައި ތަރައްގީކޮށްފައިވާ އަމާން އުދަރެސްގެ ހަތްވަނަ ޓަވަރުގެ ފުރަތަމަ ފަންގިފިލާގައި ތަރައްގީކުރެވޭ ހަބެކެވެ.
ހެލްތް މިނިސްޓްރީން ބުނެފައިވާ ގޮތުގައި މި ހަބުގައި ތަފާތު އެކިކަހަލަ ޕްރޮގްރާމުތައް ކުރިއަށް ގެންދިއުމަށް ވަނީ ހަމަޖެހިފައެވެ. އެގޮތުން ކަލިނަރީ އަދި ހޮސްޕިޓާލިޓީ ދާއިރާއާއި، ރީޓެއިލް މަސައްކަތުގެ ތަމްރީނާއި، އައިޓީ ދާއިރާގެ ތަމްރީނު ޕްރޮގްރާމުތައް ހިމެނެއެވެ. އަދި ހަމައެހެންމެ، އަތްތެރި މަސައްކަތް ފަދަ އެކި ފަންނީ ހުނަރުވެރިން ބިނާކުރުމަށް ތަފާތު ތަމްރީނު ޕްރޮގްރާމުތައް ކުރިއަށް ގެންދާނެއެވެ.
މީގެ އިތުރުން، ހާއްސަ އެހީއަށް ބޭނުންވާ ފަރާތްތަކުން ތަމްސީލު ކުރާ މަދަނީ ޖަމުއިއްޔާ ޖަމާއަތްތަކުން ހިންގާ އެކިއެކި ހަރަކާތްތަކާއި، ބައްދަލުވުންތައް ބޭއްވުމަށް ހާއްސަ ޖާގައަކާއި، އެފަދަ ފަރާތްތަކަށް އަޅައިލުމާއި އޯގާތެރިކަން ފޯރުކޮށްދިނުމުގެ ގޮތުން ތަފާތު ޕްރޮގްރާމުތައް މި ހަބުގައި ބޭއްވުމަށް ވަނީ ހަމަޖެހިފައެވެ.
މި އެމްޕަވަރމަންޓް ހަބުގެ މަސައްކަތް އެއްކޮށް ނިންމައި ޖުލައި މަހު ހުޅުވުމަށް ތައްޔާރުވެފައިވާއިރު ފާހަގަކޮށްލަންޖެހޭ ކަމަކީ މި ތަނަކީ ޒަކާތު ފަންޑުން ހަރަދުކޮށްގެން ތަރައްގީކުރަމުން އަންނަ ހަބެއް ކަމެވެ.
