ހުޅުމާލޭ ދެވަނަ ފިޔަވަހީގައި ބިނާކުރާ ދެ މިސްކިތެއްގެ މަސައްކަތް ހަލުވި ދުވެލީގައި ކުރިއަށްދާ ކަމަށް އިސްލާމިކް މިނިސްޓްރީން ބުނެފިއެވެ.
މިކަމާ ގުޅިގެން އިސްލާމިކް މިނިސްޓްރީން ބުނެފައިވަނީ، ރާއްޖޭގެ އެކި ސަރަހައްދުތަކުގައި މިސްކިތްތައް އިމާރާތްކުރުމުގެ މަސައްކަތް ސަރުކާރުން ކުރަމުން އަންނަ ކަމަށެވެ. އެގޮތުން މާލޭ ސަރަހައްދުގައި ބިނާކުރެވޭ މިސްކިތްތަކަށް އަލިއަޅުވާލަމުން އިސްލާމިކް މިނިސްޓްރީން ބުނެފައިވަނީ، ހުޅުމާލެ ވިނަރެސް ފުލެޓު ސަރަހައްދުގައި ބިނާކުރާ މިސްކިތުގެ 60 އިންސައްތަ މަސައްކަތް މިހާރު ނިމިފައިވާ ކަމަށެވެ.
މި މިސްކިތަކީ ޖުމުލަ 1،095 މީހުންނަށް އެއްފަހަރާ ނަމާދުކުރެވޭ ޖާގައިގެ މިސްކިތެކެވެ.
ހުޅުމާލެ ވިނަރެސް ފްލެޓު ސަރަޙައްދުގައި ބިނާކުރާ މިސްކިތުގެ 60 އިންސައްތަ މަސައްކަތް މިހާރު ވަނީ ނިމިފައި. މިއީ 1095 މީހުންގެ ޖާގައިގެ މިސްކިތެއް. pic.twitter.com/X3KIsBZVRn
— Ministry of Islamic Affairs & Endowments (@MVIaffairs) April 16, 2026
މީގެއިތުރުން ހުޅުމާލެ ދެވަނަ ފިޔަވަހީގެ އަމާން އުދަރެސް ފުލެޓު ސަރަހައްދުގައި ވެސް ދަނީ މިސްކިތެއް ބިނާކުރަމުންނެވެ. އެގޮތުން މި މިސްކިތުގެ 75 އިންސައްތަ މަސައްކަތް މިހާރު ނިމިފައިވާއިރު، މިއީ ޖުމުލަ 1،800 މީހުންނަށް އެއްފަހަރާ ނަމާދުކުރެވޭ ޖާގައިގެ މިސްކިތެކެވެ.
ފާހަގަކޮށްލަންޖެހޭ ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށް ފަހު އިސްލާމީ ދާއިރާއިން ފާހަގަކޮށްލެވޭ ކާމިޔާބީތަކެއް ހޯދާފައިވެއެވެ. އެގޮތުން މިސްކިތް ބިނާކުރުމަށް ބަލައިލާއިރު މިދިޔަ 2025 ވަނަ އަހަރު އެކަނިވެސް 74 މިސްކިތާއި، ހަތް އިސްލާމީ މަރުކަޒާއި، ތިން ޤުރްއާން މަރުކަޒުގެ އިތުރުން ހަ ވަޤުފު ބިނާއާއެކު، މުޅިއެކު 90 މަޝްރޫއުގެ މަސައްކަތްތައް ވަނީ އެއްކޮށް ނިންމާލައިފައެވެ.
މި އަހަރުގެ މިހާތަނަށް ވެސް 15 އަށްވުރެ ގިނަ މިސްކިތްތަކުގެ މަސައްކަތް ނިންމައި ހުޅުވާފައިވެއެވެ.
