މި މަހުގެ 18 ވަނަ ދުވަހު ބާއްވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިހާބުގެ ދެވަނަ ބުރުގައި 6،093 ފަރާތަކަށް ވޯޓުލުމުގެ ހައްގު ލިބިފައިވާކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަނުން ވަނީ ދެވަނަ ބުރުގައި ވޯޓުފޮށިތައް ބަހައްޓާނެ ތަންތަނާއި ވޯޓުލުމަށް އެ ވޯޓުފޮށިތަކުގައި ރަޖިސްޓްރީވެފައިވާ ފަރާތްތަކުގެ ލިސްޓު އާންމުކޮށްފައެވެ. މި ލިސްޓުތަކުގައި ކެންޑިޑޭޓުންގެ ފަރާތުން ސޮއިކުރުމުގެ ފުރުސަތު މިއަދު މެންދުރު 12:00 އިން ފެށިގެން އިރުއޮއްސި 18:00 އާއި ހަމައަށް ވަނީ ހުޅުވާލައިފައެވެ. ސޮއިކުރުން ކުރިއަށްދާނީ އިލެކްޝަންސް ކޮމިޝަންގެ އިންތިހާބާބެހޭ މަރުކަޒުގައެވެ.
މި އިންތިހާބުގެ ދެވަނަ ބުރުގެ ވޯޓުލުން ފަސް ދާއިރާއެއްގައި ކުރިއަށްގެންދިއުމަށް އިލެކްޝަންސް ކޮމިޝަނުން ވަނީ ނިންމައިފައެވެ. އެ ފަސް ދާއިރާއަކީ:
- ބ. ދޮންފަނު ކައުންސިލްގެ އަންހެނުންނަށް ހާއްސަކޮށްފައިވާ ގޮނޑި
- ފުވައްމުލަކު ސިޓީ ކައުންސިލްގެ ދަޑިމަގު ދާއިރާގެ އަންހެނުންނަށް ހާއްސަކޮށްފައިވާ ގޮނޑި
- ހއ. ކެލާ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާގެ ގޮނޑި
- ހދ. ނޭކުރެންދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުކަމުގެ ގޮނޑި
- ލ. މާވަށު އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުކަމުގެ ގޮނޑި
އިލެކްޝަންސް ކޮމިޝަނުން ބުނެފައިވާ ގޮތުގައި، އިންތިހާބުގެ ދެވަނަ ބުރުގައި 14 ވޯޓު ފޮއްޓެއް ބަހައްޓާނެއެވެ. އެ ފޮށިތައް ބެހެއްޓުމަށް ހަމަޖެހިފައިވަނީ ދެވަނަ ބުރަށް ދިޔަ ދާއިރާތަކާއި މާލޭ ސިޓީގައެވެ. އެގޮތުން ކެލާ، މާވަށް އަދި ފުވައްމުލަކު ސިޓީ ދަޑިމަގު އަވަށުގެ ތެރެއިން ކޮންމެ ރަށެއްގައި 2 ފޮށި، ނޭކުރެންދޫ އަދި ދޮންފަނުގެ ތެރެއިން ކޮންމެ ރަށެއްގައި ފޮއްޓެއް ބަހައްޓަން އެ ކޮމިޝަނުން ވަނީ ނިންމައިފައެވެ.
މީގެ އިތުރުން އެ ދާއިރާތަކަށް ހާއްސަކޮށް މާލޭ ސިޓީގައި ވެސް ހަ ވޯޓު ފޮށި ބެހެއްޓުމަށް ވަނީ ހަމަޖެހިފައެވެ. އެގޮތުން ކެލާ އަދި ދޮންފަނު ދާއިރާގެ ރައްޔިތުން ވޯޓުލުމަށް ހާއްސަކޮށްފައިވާ ވޯޓުފޮށިތައް ތާޖުއްދީން ސްކޫލުގައި ބެހެއްޓުމަށް ހަމަޖެހިފައިވާއިރު، ނޭކުރެންދޫ އާއި މާވަށު ދާއިރާގެ ވޯޓުފޮށިތައް ހިރިޔާ ސްކޫލުގައި އަދި ފުވައްމުލަކު ދަޑިމަގު އަވަށުގެ ވޯޓުފޮށި ދަރުމަވަންތަ ސްކޫލުގައި ބެހެއްޓުމަށް ވަނީ ހަމަޖެހިފައެވެ.
