ކުންފުނިތަކުގެ ވެރިންވަނީ ދަޢުލަތަށް ޣައްދާރުވެފައި ކަމަށާއި، ޚާއްސަކޮށް މަގުހަދާ ކުންފުނި ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ) ގެ ހުރިހާ މުވައްޒަފުން ވަކިކޮށް، ކުންފުނިތަކުގެ ވެރިންވެސް ވަކިކޮށް ހުރިހާ ކުންފުނިތައް ރިފޯމްކުރަން ރައްޔިތުންގެ މަޖްލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ސަރުކާރަށް ގޮވާލައްވައިފިއެވެ.
އައްބާސް މިފަދައިން ގޮވައިލެއްވީ 20 ވަނަ ރައްޔިތުންގެ މަޖްލީހުގެ މިއަހަރުގެ ފުރަތަމަ ދައުރުގެ 8 ވަނަ ޖަލްސާގައި ވާހަކަ ދައްކަވަމުންނެވެ. އައްބާސް މިފަދައިން ވިދާޅުވެ ކަންބޮޑުވުން ފާޅުކުރެއްވީ އޭނާ ނިސްބަތްވެ ވަޑައިގަންނަވާ ވެލިދޫ ދާއިރާގެ ތަރައްޤީގެ މަޝްރޫޢުތައް ކުރިއަށްނުދާކަމަށް ވިދާޅުވެ ވާހަަކަ ދައްކަވަމުންނެވެ. އޭނާގެ އެންމެ ބޮޑު އެއް ކަންބޮޑުވުމަކީ ނިމިދިޔަ އެމްޑީޕީ ސަރުކާރާއި، ހިނގަމުންމިދާ ޕީއެންސީ ސަރުކާރު ހިމަނައިގެން ފާއިތުވެދިޔަ 7 އަހަރުގެ ތެރޭގައި އައްބާސްގެ އުފަން ރަށް ވެލިދޫގެ މަގުތައް ހަދާ ނުނިމޭ މައްސަލައެވެ. މިކަމަށް ޢިޝާރާތް ކުރައްވާ އައްބާސް ވަނީ އެއީ ދަޢުލަތުން ކުރާ އިސްރާފެއްގެ ގޮތުގައި ސިފަކުރައްވާފައެވެ.
”ކުރީ ސަރުކާރާއި، މިސަރުކާރު ހިމަނައިގެން ވެލިދޫގެ މަގުތައް ހަދާތާ މިއީ 7 އަހަރު ދުވަސް. އެންމެ މަގެއްގެ ކޯނަރު ނުނިމޭ، އެންމެ މަގެއްގެ ތާރެއް ނޭޅޭ. ކުރިން ގާ ޖަހާފައިހުރި ތަން އަނެއްކާ ގާ ނަގާފައި ގާ ޖަހަން، 100 އެއްހާ މުވައްޒަފުން އެބަތިބި، ދަޢުލަތުގެ ބަޖެޓުން ކުރާ ބޮޑު އިސްރާފެއް އެއީ..“ އައްބާސް ވިދާޅުވިއެވެ.
މިމޭރުމުން ވާހަކަ ދައްކަވަމުން އައްބާސް ވަނީ ސަރުކާރުގެ ކުންފުނިތަކާމެދު ނުރުހުން ފާޅުކުރައްވާފައެވެ. ވަކިން ޚާއްޞަކޮށް މަގުހަދާ ކުންފުނި އާރުޑީސީއަށް އައްބާސްވަނީ ވަރަށް ބޮޑަށް ފާޑުވިދާޅުވެފައެވެ. އެގޮތުން އާރުޑީސީގެ ހުރިހާ މުވައްޒަފުން ވަގުތުން ވަކިކުރަން ޖެހޭ ކަމަށާއި، އެއީ ދަޢުލަތަށް ޣައްދާރުވެފައި ތިބި ބައެއްގެ ގޮތުގައި އައްބާސް ސިފަކުރެއްވިއެވެ.
”ރާއްޖޭގެ މަޝްހޫރު އެންމެ ގިނަމަގު ހަދާކަމަށްވާ އާރުޑީސީ އާ ހަވާލުކޮށްފައޮތީ.. އާރުޑީސީގެ ވެރިން ވިދާޅުވަނީ އޮންގޮއިން އޭ އޮންގޮއިންއޭ، މެސެނަރީ ކަމިންގއޭ، މެސެނަރީ ކަމިންގއޭ، ކުރިއަކަށް ނުކަނޑާ ޢިއްޒަތްތެރި ރައީސް، ކަނޑައެޅިގެން ދޮގު. އާރުޑީސީ ބޭފުޅުން މިހާރު ވަކިކުރަންވީ ރައީސުލްޖުމްހޫރިއްޔާގެ ޚާއްޞަ އެންގުމެއްގެ ތެރެއިން ވަޒީފާއިންވެސް. ސީދާ ދަޢުލަތަށް ޣައްދާރުވާ ބައެއްއެއީ..“ އައްބާސް ވިދާޅުވިއެވެ.
އައްބާސް ފާހަގަކުރެއްވި ގޮތުގައި، ނ، ވެލިދޫ އައުޓްޑޯ ޖިމް، ކުޑަކުދިންގެ ޕާކު، ވެލިދޫ ހޮސްޕިޓަލް، ޕޮލިސް ސްޓޭޝަން، ޑިޓޮކްސް ސެންޓަރު، އަދި ވޭސްޓް މެނޭޖްމެންޓް، މަޝްރޫޢުވެސް ހަވާލުކޮށްފައިވަނީ އާރުޑީސީއާއެވެ. އެހެންނަމަވެސް މީގެ ތެރެއިން އެއްކަމެއްވެސް ނިމިފައިނުވާ ކަމަށާއި، ބިމުން މައްޗަށް ތަނބުކޮޅެއް އެރުން ނޫންކަމެއް މިހިނގާ ދުވަސްތަކުގައި އަދިނުވާ ކަމަށް ވިދާޅުވިއެވެ. ޖުމްލަގޮތެއްގައި ދަޢުލަތުގެ ބަޖެޓަކުން ވެލިދޫއަކަށް، އަދި ވެލިދޫގެ އެއްވެސް ރައްޔިތަކަށް ވީ މަންފާއެއް ނެތް ކަމަށްވެސް އައްބާސް ވިދާޅުވިއެވެ.
އައްބާސް އިތުރަށް ވިދާޅުވީ ސަރުކާރުގެ ހުރިހާ ކުންފުނިތަކުގެ ވެރިންނަކީ ޚިޔާނާތްތެރިންތަކެއް ކަމަށާއި، ކުންފުނިތަކުގެ ވެރިން ދަޢުލަތަށް ޣައްދާރުވެފައިވާ ކަމަށެވެ. އެހެންކަމުން ވަގުތުން ވަގުތަށް ކުންފުނިތަކުގެ ވެރިން ވަކިކޮށް ކުންފުނިތައް ރިފޯމްކުރަން އައްބާސް ވަނީ ރައީސްއަށް ގޮވާލައްވާފައެވެ.
މުޅި ޤައުމުގެ ޙައްޤުގައި ބަސްބުނަން މިއަދު މަޖުބޫރު ކަމަށާއި، ރެޔާއި ދުވާލު އޭނާ ކުރައްވަމުން ގެންދަވަނީ އެ މަސައްކަތް ކަމަށް އައްބާސް ވިދާޅުވިއެވެ.
