ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޑިފެންސް މިނިސްޓްރީގެ ނަން، ”މިނިސްޓްރީ އޮފް ޑިފެންސް އެންޑް ނޭޝަނަލް ސަރވިސް“ގެ ނަމަށް މިއަދު ބަދަލުކުރައްވައިފިއެވެ.
މިކަން އިއުލާންކުރައްވާފައިވަނީ، ރައީސުލްޖުމްހޫރިއްޔާގެ އޮފީހުން މިއަދު ޝާއިއުކުރެއްވި، ނަންބަރު 2026/10 ދެންނެވުމުންނެވެ.
މިނިސްޓްރީ އޮފް ޑިފެންސްގެ ނަން، މިގޮތަށް ބަދަލުކުރެއްވުމާ ގުޅިގެން، އެ މިނިސްޓްރީއަށް ދިވެހިބަހުން ބޭނުންކުރަން ހަމަޖައްސަވައިފައިވާ ރަސްމީ ނަމަކީ، ”ދިފާޢީ އަދި ވަތަނީ ހިދުމަތާ ބެހޭ ވުޒާރާ“ އެވެ. އަދި ދައުލަތުގެ އިދާރާތަކުން ލިޔުއްވާ ސިޓީގައި ނަންބަރު ޖެއްސެވުމުގައި، ”މިނިސްޓްރީ އޮފް ޑިފެންސް އެންޑް ނޭޝަނަލް ސަރވިސް“ އަށް ލިޔުއްވާ ސިޓީގައި ޖައްސަވަމުން ގެންދަވާނީ، މިހާތަނަށް މިނިސްޓްރީ އޮފް ޑިފެންސަށް ހަމަޖައްސަވައިފައިވާ ނަންބަރު 28 އެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ވުޒާރާގެ ނަން ބަދަލުކުރައްވާފައިވާއިރު، ދާހިލީ ވަޒީރުގެ މަގާމަށް އާ ބޭފުޅަކު ވަނީ އައްޔަންކުރައްވައިފައެވެ. އެ މަގާމަށް އަލަށް އައްޔަންކުރައްވާފައިވާ ބޭފުޅަކީ ޙަސަން ރަޝީދުއެވެ.
ރައީސް މުޢިއްޒު މި ބަދަލު ގެންނަވާފައިވަނީ އިއްޔެގެ ވަގުތެއްގައި ވަޒީރުންގެ މަޖިލީހުގެ 10 ވަޒީރަކު މަގާމުން އިސްތިއުފާ ދެއްވުމާއި ގުޅިގެންނެވެ. އެއާއިއެކު އެމަނިކުފާނު ވަނީ ކެބިނެޓަށް ބޮޑު ބަދަލެއް ގެންނަވައި ސަރުކާރުގެ އިދާރީ ހިންގުމަށް ބޮޑު ބަދަލެއް ގެންނަވައިފައެވެ. އެގޮތުން މިނިސްޓްރީތަކުގެ އަދަދު މިހާރު ވަނީ 15 އަށް މަދުކުރައްވައިފައެވެ.
މިކަމާ ގުޅިގެން ރައީސުލްޖުމްހުރިއްޔާގެ އޮފީހުން ބުނެފައިވަނީ، އަލަށް ގެނެވުނު މި ބަދަލަކީ ރައްޔިތުންގެ ވިންދާ އެއްގޮތަށް ސަރުކާރު ހިންގެވުމަށް ރައީސް މުޢިއްޒު ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމުގެގޮތުން ގެނެވުނު ބަދަލެއް ކަމަށެވެ.
