ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ”ވަތަނީ ޚިދުމަތުގެ ބިލު“ މަޖިލީހަށް ބަލައިގަނެ، ބިލު އިތުރަށް ދިރާސާކުރުމަށްޓަކައި ސަލާމަތީ ހިދުމަތްތަކާބެހޭ ކޮމިޓީއަށް ފޮނުވައިފިއެވެ.
ސަރުކާރުގެ ފަރާތުން ކުޅުދުއްފުށި ދެކުނު ދާއިރާގެ މެންބަރު ފަރުޙަތު މުޙައްމަދު ހުށަހެޅުއްވި މި ބިލުގައި ބަޔާންކޮށްފައިވާ ގޮތުން، މި ބިލު ގާނޫނަކަށްވުމުން، އަސާސީ ތައުލީމާއި ތަމްރީނު ހިމެނޭހެން، ދައުލަތުގެ ޔުނިފޯމް އެޅި ހިދުމަތްތަކުގެ ތެރެއިން ކަނޑައެޅޭ ވަކި ހިދުމަތެއްގައި މަސައްކަތްކުރުމުގެ ބައި ހިމެނޭ ހާއްސަ ޕްރޮގްރާމެއް ހިންގަންޖެހޭނެއެވެ.
މި ޕްރޮގްރާމުގެ މައިގަނޑު މަގުސަދަކަށް ވާންޖެހޭނީ އިސްލާމްދީނުގެ މަތިވެރި އުސޫލުތަކަށް ބޯލަނބާ، ދީނީ ޝިއާރުތަކަށް އިހުތިރާމްކުރާ، އަދި ގައުމީ ލޯތްބާއި ގައުމިއްޔަތަށް އިސްކަންދޭ ފަހުރުވެރި ޒުވާން ޖީލެއް ބިނާކުރުން ކަމަށް ބިލުގައި ބަޔާންކޮށްފައިވެއެވެ.
މި ޕްރޮގްރާމުގައި ބައިވެރިވުމުގެ ފުރުސަތު އުމުރުން 16 އަހަރާއި 21 އަހަރާ ދެމެދުގެ ކޮންމެ ދިވެހި ޒުވާނަކަށް އޮންނާނެއެވެ. ނަމަވެސް، 18 އަހަރު ނުފުރޭ ކުދިން މި ޕްރޮގްރާމުގައި ބައިވެރިކުރެވޭނީ، އެ ކުއްޖެއްގެ އަމިއްލަ އިހުތިޔާރާއި ބެލެނިވެރިޔާގެ ހުއްދަ ލިބިގެންނެވެ. މީގެ އިތުރުން، ޕްރޮގްރާމުގައި ބައިވެރިވާން އެދޭ ފަރާތްތަކަކީ ގާނޫނުގެ ދަށުން އެކުލަވައިލާ ގަވާއިދުގައިވާ މެޑިކަލް އެސެސްމަންޓްތަކުން ފާސްވާ ފަރާތްތަކަކަށް ވާންޖެހޭނެ ކަމަށްވެސް ބިލުގައި ބަޔާންކޮށްފައިވެއެވެ.
މި ބިލުގައި ބަޔާންކޮށްފައިވާ ގޮތުން، ވަޠަނީ ޚިދުމަތުގެ ޕްރޮގްރާމުގައި ބައިވެރިވާ ޒުވާނުންގެ އަސާސީ ތައުލީމާއި ތަމްރީނުގެ މުއްދަތުގައި ބޭނުންވާނެ ހުރުމާއި، ކެއުމާއި، ބޭސްފަރުވާގެ އިތުރުން ދަތުރުފަތުރުގެ ހަރަދުތައް ހަމަޖައްސައިދޭންޖެހޭނީ ޑިފެންސް މިނިސްޓްރީންނެވެ. މީގެ އިތުރުން، މި މުއްދަތުގައި އެކަށީގެންވާ އިނާޔަތެއް އެ ފަރާތްތަކަށް ފޯރުކޮށްދޭންވާނެ ކަމަށް ވެސް ބިލުގައި ބަޔާންކޮށްފައިވެއެވެ.
މި ޕްރޮގްރާމުގެ އަސާސީ ތަމްރީނުތައް ފުރިހަމަ ކުރާ ޒުވާނުން، ޔުނިފޯމު އެޅި ހިދުމަތެއްގައި މަސައްކަތް ކުރަންޖެހޭނެއެވެ. އެއް އަހަރަށްވުރެ އިތުރުނުވާނެހެން، މި ހިދުމަތް އަދާކުރާނެ ވަކި ދާއިރާއެއް ކަނޑައަޅާނީ އެކަމަށްޓަކައި އެކުލަވައިލާ ”ގަވަރނިން ކައުންސިލް“ އިންނެވެ. އަދި ހިދުމަތުގެ މުއްދަތު ހަމަވުމުން، ޔުނިފޯމު އެޅި މުއައްސަސާތަކުން ދާއިމީ ވަޒީފާ ހޯދުމުގެ ފުރުސަތު އެ ޒުވާނުންނަށް މަގުފަހިކޮށްދެވޭނެއެވެ.
މި ބިލު ޤާނޫނަކަށްވުމުން އުފެދިގެންދާ ގަވަރނިން ކައުންސިލަކީ، ޑިފެންސް މިނިސްޓަރާއި، ހޯމް މިނިސްޓަރާއި، ފިނޭންސް މިނިސްޓަރުގެ އިތުރުން ޗީފް އޮފް ޑިފެންސް ފޯސް އަދި ކޮމިޝަނަރ އޮފް ޕޮލިސް ހިމެނޭހެން އެކުލަވައިލެވޭ ކައުންސިލެކެވެ. މި ކައުންސިލްގެ ރައީސަކީ ރައީސުލްޖުމްހޫރިއްޔާއެވެ. އަދި ކައުންސިލްގެ ނައިބު ރައީސަކީ ޑިފެންސް މިނިސްޓަރު ކަމަށް ވެސް ބިލުގައި ވަނީ ބަޔާންކޮށްފައެވެ.
