ކުޅުދުއްފުށި ސިޓީ ބޮޑަވަކިވާ ބީޗުގެ މޫދު އަޑިން މަރުވެފައި އޮތް މީހަކު ފެނިއްޖެއެވެ.
މިކަމާ ގުޅިގެން ދާދި ދެންމެ ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ، ކުޅުދުއްފުށި ސިޓީން 59 އަހަރުގެ ދިވެހި ފިރިހެނަކު ގެއްލިފައިވާ މައްސަލައެއް މިއަދު މެންދުރުފަހު 13:48 އެހައިކަންހާއިރު ފުލުހުންނަށް ރިޕޯޓްކޮށްފައިވާ ކަމަށެވެ. ގެއްލިގެން ހޯދަމުން ދިޔައީ، ސުލައިމާން ޙުސައިން، ބަޑިފަސްގަޑުގެ / ހދ. ކުޅުދުއްފުށި ކަމަށް ފުލުހުން މައުލޫމާތުދެއެވެ.
ސުލައިމާން ހޯދުމުގެ މަސައްކަތް ކުރަމުން ދަނިކޮށް މިއަދު މެންދުރުފަހު 15:00 އެހައިކަންހާއިރު، ބޮޑަވަކިވާ ބީޗް މޫދު އަޑީގައި އޭނާ އޮއްވާ ފެނިފައިވާ ކަމަށާއި، އެއާއިއެކު މިހާރު ކުޅުދުއްފުށި ސިޓީ ރީޖަނަލް ހޮސްޕިޓަލަށް އޭނާ ގެންގޮސްފައިވާކަމަށް ފުލުހުން ވަނީ ބުނެފައެވެ. އެ ހޮސްޕިޓަލާއި ހަވާލާދީ ފުލުހުން ބުނީ، ހޮސްޕިޓަލަށް ގެންދިޔައިރު ވެސް އެ މީހާ ނިޔާވެފައިވާ ކަމަށެވެ.
މި މައްސަލަ އިތުރަށް ތަހުގީގުކުރަމުން އަންނަކަމަށް ފުލުހުން ވަނީ އިތުރަށް ބުނެފައެވެ.
