ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިނިސްޓަރ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް ކަމަށް އަޙްމަދު ޝިޔާމް ޢައްޔަންކުރައްވައިފިއެވެ.
މިނިސްޓަރަށް މަގާމުގެ ފަތްކޮޅު ދެއްވުމަށް ބޭއްވެވި ރަސްމިއްޔާތު އޮތީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައެވެ. މި ރަސްމިއްޔާތުގައި ވަޒީރުންގެ މަޖިލީހުގެ މެންބަރުކަމުގެ ހުވައި ލައިދެއްވީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު އަލްއުސްތާޛު ޢަބްދުﷲ ޙަމީދުއެވެ. ހުވައި ކުރެއްވުމަށްފަހު، ވަޒީރުންގެ މަޖިލީހުގެ މެންބަރުންގެ ހުވައިގެ އިޤްރާރުގައި މިނިސްޓަރު ވަނީ ސޮއިކުރައްވައިފައެވެ.
މި ބަދަލަކީ މީގެކުރިން ވަކި ދެ މިނިސްޓްރީއެއްގެ ގޮތުގައި ހިންގި ފިޝަރީޒް މިނިސްޓްރީއާއި އެގްރިކަލްޗަރ މިނިސްޓްރީ އެއްކޮށްލުމަށް ރައީސް މުޢިއްޒު ނިންމެވުމާ ގުޅިގެން ގެނެވުނު ބަދަލެކެވެ. މި ބަދަލު ގެނެވުމުގެ ކުރިން އެގްރިކަލްޗަރ މިނިސްޓަރުގެ މަގާމުގައި ހުންނެވީ ޑރ. މަރްޔަމް މާރިޔާއެވެ. ނަމަވެސް، އިއްޔެގެ ވަގުތެއްގައި އެކަމަނާއާއިއެކު ޖުމުލަ 10 މިނިސްޓަރަކު ވަނީ މަގާމުން އިސްތިއުފާ ދެއްވައިފައެވެ.
އެއާއިއެކު މިނިސްޓްރީތަކުގެ އަދަދު 15 އަށް މަދުކޮށް ސަރުކާރުގެ ހިންގުމަށް ވަނީ ބޮޑެތި ބަދަލުތަކެއް ގެނެސްފައެވެ. މިކަމާ ގުޅިގެން ރައީސުލްޖުމްހުރިއްޔާގެ އޮފީހުން ބުނެފައިވަނީ، އަލަށް ގެނެވުނު މި ބަދަލަކީ ރައްޔިތުންގެ ވިންދާ އެއްގޮތަށް ސަރުކާރު ހިންގެވުމަށް ރައީސް މުޢިއްޒު ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމުގެގޮތުން ގެނެވުނު ބަދަލެއް ކަމަށެވެ.
