އެމަނިކުފާނުގެ ވެރިކަމުގައި އަމިއްލަ ކެބިނެޓު އެއްފަހަރާ އިސްތިއުފާ ދެއްވުމުންވެސް، އެކުލަވާނުލި އިންތިޤާލީ ސަރުކާރު އެކުލަވާލަން ކުރީގެ ރައީސް ނަޝީދު ގޮވާލައްވައިފިއެވެ.

Ads by

ބަރުލަމާނީ ނިޒާމަކުން ބޮޑުވަޒީރުކަމުގެ ހުވަފެންދެކެވަޑައިގަންނަވާ ނަޝީދު މިކަމަށް ގޮވާލެއްވީ ސަރުކާރުގެ ހިންގުން ހަރުދަނާ ކުރުމަށް ކަމަށްބުނެ 10 ވަޒީރަކު އިސްތިއުފާ ދެއްވުމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކެބިނެޓަށް މުހިންމު ބަދަލުތަކެއް ގެނެސްފައިވާ ދަނޑިވަޅެއްގައެވެ.

ނަޝީދު ސޯޝަލްމީޑިއާގައި ކުރެއްވި ޕޯސްޓެއްގައި ވިދާޅުވީ ކެބިނެޓްގެ މައްޗަށް ރައީސުލްޖުމްހޫރިއްޔާގެ އިތުބާރު ގެއްލިއްޖެކަމަށާއި، ރައީސުލްޖުމްހޫރިއްޔާގެ މައްޗަށް ރައްޔިތުންގެ އިތުބާރުވެސް ގެއްލިއްޖެކަމަށެވެ. ނަޝީދު މިފަދައިން ވިދާޅުވިއިރު އައު ކެބިނެޓް އެކުލަވާނުލައެވެ. ކެބިނެޓަށް ރައީސް ގެންނަވަން ނިންމެވި ބަދަލު އެނގިވަޑައިނުގަތް ހުންނަވާ ނަޝީދު ވިދާޅުވީ މިދަނޑިވަޅު ހަނގުރާމައިގެ ނޭދެވޭއަސަރު ރާއްޖޭގެ އިޤްތިޞާދަށް ބޮޑުކޮށް ކުރަން ފަށައިފިކަމަށާއި، އެހެންކަމުން، ބޭނުން ޖެހިފައިވާ އަސާސީ އޮނިގަނޑުގެ އިސްލާހުތައް ގެންނަންޖެހޭ ކަމަށެވެ.

މިއާއިއެކު ނަޝީދު ގޮވައިލެއްވީ މިނިވަން އިންސާފުވެރި އިންތިޚާބެއް ރާވާ ހިންގަން ހުރިހާ ޕާޓީއެއް އެކުލެވޭ އިންތިޤާލީ ސަރުކާރެއް އެކުލަވާލުމަށެވެ.

Cabinet ge ma’chah Raeesul Jumhooriyya ge ithubaaru gehlijje. Raeesul Jumhooriyyaage ma’chah rayyithunge ithubaaru gehlijje.
Midhandivalhu hanguraamaige neydhevey asaru Raajjeyge iqthisoadhah bodukoh kuran fashaifi. Veemaa beynun jehifavaa asaasee, oniganduge islaahuthah…

— Mohamed Nasheed (@MohamedNasheed) April 14, 2026

ނަޝީދުގެ މި ޕޯސްޓާއެކު ގިނަބަޔަކު ދަނީ އޭނާގެ ވެރިކަމުގައި މުޅި ކެބިނެޓް އެއްކޮށް އެއްދުވަހެއްގައި އިސްތިއުފާ ދެއްވި ދުވަސް ހަނދާންކޮށްދެމުންނެވެ.

އިދިކޮޅު އެމްޑީޕީގެ އެއް އެޑްވައިޒަރުގެ ގޮތުގައި މިހާރު ހުންނެވި ނަޝީދު މިކަމަށް ގޮވާލެއްވި ނަމަވެސް ރައީސް އޮފީހުން ބުނެފައި ވަނީ 10 ވަޒީރުން މިއަދު އިސްތިއުފާ ދެއްވީ، ރައްޔިތުންގެ ވިންދާ އެއްގޮތަށް ސަރުކާރު ހިންގަން ރައީސް ޑރ. މުޢިއްޒު ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވަން ކަމަށެވެ.