ސްރީލަންކާގައި ތާށިވެފައި ހުރުމުގެ ސަބަބުން ރާއްޖެއަށް ނުގެނެވި ހުރި 2،500 ކޮންޓެއިނަރު މި ހަފްތާގައި ރާއްޖެއަށް ގެނެވޭނެކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
މިނިސްޓަރު ސަޢީދު މި މޭރުމުން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ. މިނިސްޓަރު ވިދާޅުވީ، ސްރީލަންކާގައި ތާށިވެފައި ހުރި މުދާ ޝިޕްމަންޓުތަކުގެ ތެރެއިން ބޮޑު ބައެއް މި ހަފުތާގެ ތެރޭގައި ރާއްޖެއަށް ގެނެވޭނެ ކަމަށެވެ.
”މިދިޔަ ހަފުތާގައި ހުރިކަމަށް ދެންނެވިން 4،241 ކޮންޓެއިނަރު. ނަމަވެސް މި ވަގުތު ބަނދަރުގައި އޮތް ބޯޓުތަކާއިއެކު، މި ހަފުތާގައި އައުމަށް ހަމަޖެހިފައިވާ ބޯޓުތައް އައުމުން، މިހާރު ލަންކާގައި ހުންނާނެ ކަމަށް ލަފާ މި ކުރެވެނީ 1،741 ކޮންޓެއިނަރުގެ މުދާ،“ – މިނިސްޓަރު ސަޢީދު ވިދާޅުވިއެވެ.
މި ވަގުތު ބަނދަރުގައި އޮތް އުޅަނދެއްގައި 1،200 ޓީއީޔޫގެ މުދާ އެބަހުރިކަން ފާހަގަކުރައްވަމުން މިނިސްޓަރު ވިދާޅުވީ، މީގެ ތެރެއިން 2،500 ޓީއީޔޫގެ މުދާ މި ހަފުތާގެ ތެރޭގައި ރާއްޖެއަށް ގެނައުމަށް ހަމަޖެހިފައިވާ ކަމަށެވެ. އެގޮތުން އިއްޔެއާއި އޭގެ ކުރީ ދުވަހު 1،000 ކޮންޓެއިނަރު އަދި މިއަދު 1،500 ކޮންޓެއިނަރު ވަނީ ރާއްޖެ ގެނެސްފައެވެ.
ރާއްޖެއަށް މުދާ ގެނައުން ލަސްވެ، އެތެރެކުރާ މުދާ ކްލިއަރ ނުކުރެވި ދިގުލައިގެންދާކަމުގެ ޝަކުވާ ވިޔަފާރިވެރިން ކުރަމުންއަންނަތާ ދުވަސްކޮޅެއް ވެއްޖެއެވެ. މިކަން މިހެން ދިމާވުމަށް މެދުވެރިވީ ސަބަބަކީ، މެދުއިރުމަތީގައި މިހާރު ހިނގަމުން އަންނަ ހަނގުރާމައާއި ގުޅިގެން ބައިނަލްއަޤުވާމީ ޝިޕިން ޚިދުމަތްތަކަށް ދިމާވި ގޮންޖެހުންތަކުގެ ސަބަބުންނެވެ.
