އީފާސް މެދުވެރިކޮށް ފަސޭހަކަމާއެކު ބޭހަށް އޯޑަރު ކުރެވޭނެ އިންތިޒާމު ސްޓޭޓްފާމާ އިން ހަމަޖައްސައިފިއެވެ.
މި އާ ޚިދުމަތާ ގުޅޭގޮތުން އެމްއެމްޓީވީގެ ”އަދާހަމަ“ ޕްރޮގްރާމުގައި ވާހަކަދައްކަވަމުން ސްޓޭޓްފާމާގެ މެނޭޖިންގ ޑިރެކްޓަރު ޑރ. ޝާހް ވިދާޅުވީ، އީފާސް މެދުވެރިކޮށް މިހާރު ބޭސް ސިޓީ އަޕްލޯޑްކުރުމާއި ބޭހަށް އޯޑަރު ދިނުމުގެ ފުރުޞަތު ހުޅުވާލެވިފައިވާ ކަމަށެވެ. މީގެ އިތުރުން، އޯޑަރުކުރާ ބޭސްތައް ޑެލިވަރީވަމުންދާ މަރުޙަލާތައް ވެސް އީފާސް މެދުވެރިކޮށް ކަސްޓަމަރުންނަށް ވަގުތުން ބަލައިލެވޭނެކަމަށް އޭނާ ފާހަގަކުރެއްވިއެވެ.
ބޭސް ފޯރުކޮށްދިނުމުގެ ޚިދުމަތް އިތުރަށް ހަރުދަނާކުރުމުގެ ގޮތުން، ސްޓޭޓްފާމާއިން ވަނީ 24 ގަޑިއިރު ޚިދުމަތްދޭ ހޮޓްލައިން ނަންބަރު 1505 ތަޢާރަފްކޮށްފައެވެ. މި ހޮޓްލައިން ތަޢާރަފްކުރުމުގެ މައިގަނޑު މަޤުޞަދަކީ، ޒަރޫރީ ބޭސްތައް ހޯދުމުގައި އާންމުންނަށް ދިމާވާ ދަތިތަކަށް އަވަސް ޙައްލެއް ހޯދައިދިނުމެވެ.
ސްޓޭޓްފާމާ އަކީ ރާއްޖޭގައި ބޭސް ލިބުމުގެ ދިމާވެފައިވާ ދަތިތަކަށް ދާއިމީ ޙައްލެއް ހޯއްދަވައިދެއްވުމަށްޓަކައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޤަރާރަކުން އުފައްދާފައިވާ ސަރުކާރުގެ ކުންފުންޏެކެވެ. މި ކުންފުނީގެ މައިގަނޑު މަޤުޞަދަކީ މުޅި ރާއްޖޭގައި ބޭސް ލިބުމުގެ އިންތިޒާމުތައް މިހާރަށްވުރެ އިތުރަށް ހަރުދަނާކޮށް، އާންމުންނަށް ބޭހާއި ގުޅޭ ޚިދުމަތްތައް ފޯރުކޮށްދިނުމެވެ.
