ނިމިދިޔަ ކައުންސިލް އިންތިޚާބަށްފަހު އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ތެރޭގައި އުފެދުނު ކޯޅުމުގެ ތެރެއިން ހުށަހެޅި އެޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާގެ އިތުބާރު ނެތްކަމުގެ މައްސަލަ އަނބުރާ ގެންގޮސް އެ ޕާޓީގެ އިސް ދެ މަޤާމުން ޣަފޫރު ވަކިކުރި ދެ ބޭފުޅުންގެ މަޤާމު އަލުން އިއާދަކުރަން ނިންމައިފި އެވެ.
އެމްޑީޕީގެ އެތެރޭގައި އުފެދުނު ކޯޅުމުގައި ޕާޓީގެ އަސާސީ ޤަވާއިދާ ޚިލާފަށް މަޤާމުން ވަކިކުރީ އެ ޕާޓީގެ ޑެޕިއުޓީ ލީޑަރުގެ ނައިބުގެ (އިދާރީ) މަޤާމުގައި ހުންނެވި އިބްރާހިމް ވަހީދު (އިބްރޭ) އާއި އެ ޕާޓީގެ ލީގަލް ޑިރެކްޓަރުގެ މަގާމުގައި ހުންނެވި އަހުމަދު މައުރޫފް އެވެ.
އުސޫލާ ޚިލާފަށް އެ ދެ ބޭފުޅުން މަޤާމުން ވަކިކުރީ، ކައުންސިލް އިންތިޚާބުން އެމްޑީޕީއަށް ލިބުނު ކާމިޔާބީ ފާހަގަކުރުމަށް ބޭއްވި ޖަލްސާގައި ވާހަކަދެއްކުމުގެ ފުރުސަތު ކުރީގެ ރައީސް މުހައްމަދު ނަޝީދުއަށް ނުދިނުމުން އުފެދުނު ނުތަނަވަސްކަމުގެ ތެރެެއިންނެވެ. އެ ހަމަނުޖެހުމުގެ ތެރެއިން ޣަފޫރުގެ އިތުބާރު ނެތްކަމުގެ މައްސަލައިގައި ހޯމަ ދުވަހު އެމްޑީޕީ ގައުމީ މަޖިލީސް އެއްވާންވެސް ވަނީ ނިންމާފައެވެ. އަދި 50 ސޮއި ހަމަކޮށް އެ މައްސަލަ ވަނީ ނަޝީދު ފެކްޝަނުން ޕާޓީއަށް ރަސްމީކޮށް ހުށަވެސް އަޅާފައެވެ. އެހެންނަމަވެސް އެ މައްސަލަތަކަށް ހައްލެއް ހޯދުމަށްޓަކައި އެމްޑީޕީގެ ލީޑަޝިޕްގައި ކުރެވުނު މަޝްވަރާތަކަށްފަހު، ޣަފޫރުގެ އިތުބާރު ނެތްކަމުގެ މައްސަލަ މިހާރު ނަގަން ނިންމާފައިވާކަމަށް ވެއެވެ. އަދި މިއާއިއެކު އެމްޑީޕީގެ އިސް މަޤާމުތަކުން ވަކިކުރި، މައުރޫފް އާއި އިބުރޭގެ މަގާމު އަލުން އިއާދަކުރަން ވެސް ވަނީ ނިންމާފައިކަމަށް އެޕާޓީން ”އެކިއެމްވީ“ އަށް މައުލޫމާތު ދެއްވި ބޭފުޅަކު ވިދާޅުވިއެވެ.
އެމްޑީޕީން މި ނިންމުން ނިންމާފައިވާއިރު، ރޭ ހިންނަވަރުގައި އޮތް ޖަލްސާއެއްގައި ވާހަކަ ދައްކަވަމުން ކުރީގެ ރައީސް އިބްރާހިމް މުޙައްމަދު ސޯލިހު ވަނީ އެމްޑީޕީގެ ހުރިހާ ލީޑަރުން އެކުގައި މަސައްކަތް ކުރެވޭނެ ގޮތެއް ހޯދިއްޖެ ކަމަށާއި އަންނަ ރިޔާސީ އިންތިޚާބު ކާމިޔާބު ކުރުމަށް އެމްޑީޕީ ލީޑަރުން ތިބޭނީ އެކުގައި ކަމަށް ވިދާޅުވެފައެވެ. އެމަނިކުފާނު ވިދާޅުވީ ޕާޓީގެ އަމާޒަކީ އެއްވެސް ލީޑަރަކު ބާކީނުކޮށް، އެންމެން ގުޅިގެން 2028 ވަނަ އަހަރުގެ ރިޔާސީ އިންތިހާބު ކާމިޔާބު ކުރުން ކަމަށެވެ.
