މާލޭގައި ހުންނަ އިސްލާމީ މަރުކަޒުގެ ފުރާޅުގެ ޓިނުތައް ހަލާކުވެ ދަބަރަށްވުމުގެ ސަބަބުން، އެ ޓިނުތައް ބަދަލުކުރުމުގެ މަސައްކަތް ފަށާފައިވާ ކަމަށް އިސްލާމީ ކަންތައްތަކާ ބެހޭ ވަޒީރު، ޑރ. މުޙައްމަދު ޝަހީމު ޢަލީ ސައީދު ވިދާޅުވެއްޖެއެވެ.
އެކްސްގައި ޑރ. ޝަހީމް ކުރެއްވި ޕޯސްޓެއްގައި ވިދާޅުވީ އިސްލާމީ މަރުކަޒުގެ ފުރާޅުގެ ޓިނުތައް ހަލާކުވެފައި ހުރުމުގެ ސަބަބުން ވިއްސާރަ ދުވަސްވަރު މަރުކަޒު ތެރެއަށް ފެން ފައިބާކަމަށެވެ.
އަދި އެކަން ހައްލުކުރަން މަރުކަޒު ތެރޭގައި ބާލިދީ ބަހައްޓަން ޖެހޭކަމަށްވެސް ޑރ. ޝަހީމް ވިދާޅުވިއެވެ.
އިސްލާމީ މަރުކަޒުގެ ގޯތިތެރެއާއި މިސްކިތުގެ އާބާތުރަ ފިލުވުމުގެ މަސައްކަތް އެކި އަހަރުތަކުގެ މަތިން ވަނީ ކުރިއަށް ގެންގޮސްފައެވެ. މިހާރު ވެސް އިސްލާމީ މަރުކަޒުގެ ބައެއް ތަންތަނަށް ފެންފައިބާތީ އެކަމުގެ ކަންބޮޑުމުން އާންމުން ދަނީ ކުރަމުންނެވެ.
