އަލަށް އިންތިޚާބުވި ކައުންސިލަރުން އަންނަ މެއި މަހުގެ 17 ވަނަ ދުވަހު ހުވައިކުރުމަށް ހަމަޖެހިފައިވާކަމަށް ލޯކަލް ގަވަމެންޓް އޮތޯރިޓީ (އެލްޖީއޭ) އިން ބުނެފިއެވެ.
އެލްޖީއޭއިން މިކަމާ ގުޅިގެން ބުނެފައިވަނީ، އަންނަ މެއި މަހުގެ 17 ވަނަ ދުވަހަކީ އަލަށް އިންތިޚާބުވި ކައުންސިލަރުން ހުވައިކުރާ ދުވަހުގެ އިތުރުން މިހާރު ތިބި ކައުންސިލަރުންގެ ދައުރު ހަމަވާ ދުވަސް ކަމަށެވެ.
މިދިޔަ ހޮނިހިރު ދުވަހު ބޭއްވި ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި އިދިކޮޅު އެމްޑިޕީން ގިނަ ގޮނޑިތަކެއް ވަނީ ކާމިޔާބުކޮށްފައެވެ. އެގޮތުން ކައުންސިލްތަކުގެ 269 ގޮނޑި އެމްޑީޕީން ކާމިޔާބު ކޮށްފައިވާއިރު ޕީއެންސީން ކާމިޔާބުކޮށްފައިވަނީ 233 ގޮނޑިއެވެ.
މީގެ އިތުރުން ހުރިހާ ސިޓީތަކެއްގެ މޭޔަރުންގެ އިތުރުން ކައުންސިލަރުންގެ މެޖޯރިޓީ ގޮނޑިތައް ވެސް އެމްޑީޕީން ވަނީ ކާމިޔާބުކޮށްފައެވެ.
