ފާހިޝް އަމަލުތަކުން މުޖްތަމައު ސަލާމާތް ކުރެވޭނެ އަގީދާ ވަރުގަދަކޮށް، ގައިބުގައިވާ އެންމެހައި ކަންތައްތަކަށް ފުރިހަމަ މާނާގައި އީމާންވެގެން ކަމަށް ހުކުރު ހުތުބާގައި ބުނެފިއެވެ.
ހުތުބާގައި ބުނީ ހަގީގީ މާނައިގައި މާތް ﷲ އަށް އީމާންވުމަކީ އިންސާނާގެ ހިތުގައި އުފާވެރިކަމުގެ ޝުއޫރުތަކާއި ބާއްޖަވެރިކަމުގެ އިހްސާސްތައް އުފައްދާ ކަމެއް ކަމަށެވެ.
އަދި އިންސާނާގެ ހަގީގީ ކާމިޔާބީއާއި ބާއްޖަވެރިކަންވަނީ, މާތް الله އަށް ފުރިހަމަ މާނާގައި އީމާންވުމުން ކަމަށާއި އެ އީމާންކަމަކީ އިސްލާމް ދީނުގެ އަސާސް ކަމަށެވެ. އިންސާނާއަށް ދުނިޔެވީ ހަޔާތުގެ އުފަލާއި އަރާމާއި ބާއްޖަވެރިކަން ލިބޭނީ އީމާންކަން ވަރުގަދަކޮށް, ހަރުދަނާ ކޮށްގެން ކަމަށް ހުތުބާގައި ބުންޏެވެ.
ހުތުބާގައި ބުނީ މިފަދަ ދުވަސްވަރުގައި އީމާންކަން ބަލިކަށިވެ, ނުބައިމަގުން ދެވުމަކީ ވަރަށް ކައިރި ކަމެއް ކަމަށާއި މީހާގެ އުޅުމާއި, ޢަމަލުތަކުގެ ސަބަބުން ވެސް އީމާންކަން ބަލިކަށިވާ ކަމަށެވެ.
