އެމްޑީޕީގެ ކުރިމަގު އުޖާލާކުރުމަށް، ޕާޓީގެ އިސް ސަފުގައި ހަރަކާތްތެރިވާނެ އާ ޒުވާން ޖީލަކަށް ފުރުޞަތުތައް ފަހިކޮށްދިނުމަކީ ކޮންމެހެން ކުރަންޖެހިފައިވާކަމެއްކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް އަޙްމަދު ނަސީމް ވިދާޅުވެއްޖެއެވެ.
މީކާއިލް މި މޭރުމުން ވިދާޅުވީ، އޭނާގެ އެކްސް އެކައުންޓުގައި ކުރު ވީޑިއޯ ކޮޅަކާއެކު ޙިއްޞާކުރެއްވި ޕޯސްޓެއްގައެވެ. މީކާއިލް ވިދާޅުވީ، އެމްޑީޕީގެ ކުރިމަގު އުޖާލާކުރުމަކީ އެ ޕާޓީގެ މުސްތަޤުބަލަށް ޓަކައި ކޮންމެހެން ކުރަންޖެހިފައިވާކަމެއް ކަމަށާއި އެހެންކަމުން އެމްޑީޕީގެ ޗެއަރޕާސަން ކަމުގެ މަޤާމަށް ވާދަކުރައްވަން ނިންމަވާފައިވާ ކަމަށެވެ.
ސިޔާސީ މައިދާނުގައި ޕާޓީތަކުގެ ހަރަކާތްތައް އިތުރަށް ހަރުދަނާކޮށް، އާންމު ރައްޔިތުންގެ އިތުބާރު ހޯދުމަށް ޓަކައި ޒުވާނުންގެ ބައިވެރިވުން މުހިންމު ކަމުގެ މައްޗަށް ވެސް މީކާއިލް ވަނީ އަލިއަޅުއްވާލައްވައިފައެވެ.
އެމްޑީޕީގެ ޗެއަރޕާސަން ކަމުގެ މަޤާމަށް ކުރިމަތިލާން އުޅޭކަން މީކާއިލް އިޢުލާންކޮށްފައިވާއިރު، އެ ޕާޓީ ތެރޭގައި ހަމަނުޖެހުންތައް އިތުރުވެ، ޕާޓީގެ ވަގުތީ ޗެއަރޕާސަން ޢަބްދުލްޣަފޫރު މޫސާ އެ މަޤާމުން ވަކިކުރުމަށް 55 މެންބަރަކު ވަނީ ޕެޓަޝަނެއްގައި ސޮއިކޮށް ޕާޓީގެ ޤައުމީ މަޖިލީހަށް ވެސް މިހާރު ހުށަހަޅައިފައެވެ. ނަމަވެސް 100 މެންބަރުންގެ ސޮއި ހަމަކުރި ނަމަވެސް މަޤާމުން އިސްތިޢުފާ ނުދޭނެކަމަށް ޣަފޫރު ވަނީ ބުނެފައެވެ.
އެމްޑީޕީގެ ޗެއަރޕާސަން ކަމުގެ މަޤާމުން ޣަފޫރު ވަކިކުރުމުގެ މަސައްކަތް ފަށާފައިވަނީ ކުރީގެ ރައީސް މުޙައްމަދު ނަޝީދުގެ ފެކްޝަނުން އިސްވެ އޮވެއެވެ. ރައީސް ނަޝީދުގެ ފެކްޝަނުގައި އިސްކޮށް ހަރަކާތްތެރިވާ ބޭފުޅަކު ނަންނުޖެހުމަށް އެދި މި ނޫހަށް ވިދާޅުވީ، ޗެއަރޕާސަން ކަމުގެ މަޤާމުން ޣަފޫރު ވަކިކުރުމަށް ނިންމީ ލޯކަލް ކައުންސިލްތަކުގެ އިންތިޚާބުން އެމްޑީޕީއަށް ލިބުނު ކާމިޔާބީ ފާހަގަކުރަން ބޭއްވި ރަސްމިއްޔާތުގައި ވާހަކަދެއްކެވުމުގެ ފުރުޞަތު ރައީސް ނަޝީދަށް ނުދިނުމުގެ ސަބަބުން ކަމަށެވެ.
މީގެ އިތުރުން އެ ޕާޓީގެ ޑެޕިއުޓީ ޗެއަރޕާސަން އިބްރާހިމް ވަޙީދު (އިބުރޭ) އާއި ލީގަލް ޑިރެކްޓަރު އަޙްމަދު މަޢުރޫފް އެއްވެސް ޙައްޤަކާ ނުލައި މަޤާމުން ވަކިކުރުމަކީ ވެސް ޗެއަރޕާސަން ކަމުގެ މަޤާމުން ޣަފޫރު ވަކިކުރެވޭނެ ސަބަބެއްކަމަށް އޭނާ ވިދާޅުވިއެވެ. އިބުރޭއާއި މަޢުރޫފް މަޤާމުން ވަކިކުރި ސަބަބެއް އެމްޑީޕީން ހާމަކޮށްދީފައެއް ނުވެއެވެ.
