ފ. ފީއަލީ ބަނދަރުގައި އޮތް ތެޔޮ ބޯޓެއްގައި ރޯވެ ބޮޑެތި ގެއްލުންތަކެއް ލިބިއްޖެއެވެ.
މި ހާދިސާ ހިނގާފައިވަނީ މިއަދު ހެނދުނު 09:15 އެހައިކަންހާއިރުއެވެ. އަލިފާންގަނޑު ނިއްވާލުމަށް އެ ސަރަޙައްދުގައި ފުލުހުންނާއި ކަމާގުޅުން ހުރި އިދާރާތަކުން ވަނީ ހަރަކާތްތެރިވެފައެވެ. ފުލުހުން ބުނީ މި ހާދިސާގައި ބިދޭސީއަކަށް ވަރަށް ބޮޑަށް އަނިޔާވެ ފިހިފައިވާ ކަމަށާއި، އޭނާއަށް ފީއަލީ ޞިއްޙީ މަރުކަޒުގައި މިހާރު ފަރުވާ ދެމުން އަންނަ ކަމަށެވެ.
މި ހާދިސާގައި ތެޔޮ ބޯޓުގެ އިތުރުން ދެ ދޯންޏަކަށާއި ދެ ޑިންގީއަކަށް އެކިވަރުގެ ގެއްލުންތައް ވަނީ ލިބިފައެވެ. މީގެ އިތުރުން އެ ސަރަޙައްދުގައި ހުރި އައިސް ޕްލާންޓަށް ވެސް އަލިފާނުގެ އަސަރުކޮށް، އެތަނުގައި ވަނީ އަލިފާން ހިފައިފައެވެ. އެ ސަރަޙައްދުގައި ހުރި ފިއުލް ޝެޑަށް އަލިފާނުގެ އަސަރުކޮށް، ޑިސްޕެންސަރާއި ޝެޑުގެ ބައެއް ބައިތަކުގައި ވެސް އަލިފާން ރޯވެފައިވާކަމަށް ފުލުހުން ވަނީ ބުނެފައެވެ.
ފުލުހުން އިތުރަށް ބުނެފައިވަނީ އަލިފާންގަނޑު ކޮންޓްރޯލްކޮށް އަލިފާންގަނޑު އެއްކޮށް ނިއްވާލެވިފައިވާ ކަމަށެވެ.
ފުލުހުން ބުނީ މި ހާދިސާ ހިނގުމަށް މެދުވެރިވީ ސަބަބު އިތުރަށް ތަޙުޤީޤުކުރަމުން އަންނަ ކަމަށެވެ.
