ގޭހުގެ އާ ޝިޕްމަންޓެއް ރާއްޖެއަށް ގެނެސްފިއެވެ.
ގޭހުގެ އާ ޝިޕްމަންޓެއް ރާއްޖެ ގެނެސްފައިވާކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އިކޮނޮމިކް މިނިސްޓަރު މުޙައްމަދު ސަޢީދެވެ. މިނިސްޓަރު ސަޢީދު ވިދާޅުވީ، ގޭހުގެ އާ ޝިޕްމަންޓެއް ލިބިފައިވާ ކަމަށް ރޭގެ ވަގުތެއްގައި އެސްޓީއޯއިން މަޢުލޫމާތު ދީފައިވާ ކަމަށެވެ.
މިނިސްޓަރު މި މޭރުމުން ވިދާޅުވެފައިވާއިރު އެސްޓީއޯއިން ވެސް ވަނީ މިކަން ކަށަވަރުކޮށްދީފައެވެ. އެގޮތުން ގޭހުގެ އާ ޝިޕްމަންޓާއެކު އެސްޓީއޯގެ ސަބްސިޑަރީ ކުންފުނި، މޯލްޑިވް ގޭސް މެދުވެރިކޮށް 10 ކިލޯގެ ގޭސް ފުޅި އާންމުންނަށް މިހާރު ލިބޭނެކަމަށް އެ ކުންފުނިން ވަނީ ބުނެފައެވެ.
ފާއިތުވެދިޔަ ހަފުތާތަކުގައި ގޭހުގެ ޑިމާންޑް އާދަޔާޚިލާފަށް އިތުރުވުމާ ގުޅިގެން، މޯލްޑިވް ގޭހުން އަންނަނީ އެ ކުންފުނިން ވިއްކާ ގޭހުގެ ލިމިޓް ކުޑަކުރުމަށް ގިނަ މަސައްކަތްތަކެއް ކުރަމުންނެވެ. ގޭހުގެ ޑިމާންޑް ބޮޑުވުމާ ގުޅިގެން 10 ކިލޯގެ ގޭސް ފުޅީގެ ބަދަލުގައި މޯލްޑިވް ގޭހުން ވިއްކަމުން ގެންދިޔައީ ފަސް ކިލޯގެ ގޭސް ފުޅިތަކެކެވެ.
