ތުރުކީވިލާތުގައި ހުންނަ އިޒްރޭލުގެ ކޮންސުލޭޓު ހިންގަމުންދާ އިމާރާތުގެ ކައިރީގައި އިއްޔެ ވަނީ ހަތިޔާރުއެޅި 3 މީހުން ބަޑިޖަހައި، ހަމަލާއެއް ދިނުމަށް މަސައްކަތްކޮށްފައެވެ. ތުރުކީވިލާތުގެ ފުލުހުން މި ހަމަލާދިން 3 މީހުން މަރާލާފައިވާކަމަށް އެޤައުމުގެ ނޫސްތަކުން ރިޕޯޓުކޮށްފައިވާއިރު، ހަތިޔާރުއެޅި ހަނގުރާމަވެރިން ވަނީ 2 ފުލުހުން ޒަޚަމްކޮށްލާފައެވެ.
އިޒްރޭލުގެ ފޮރިން މިނިސްޓަރު ސޯޝަލް މީޑިޔާގައި ކޮށްފައިވާ ޕޯސްޓެއްގައި ނިރުބަވެރިކަމުގެ ސަބަބުން އެމީހުން ފަހައްތައް ނުޖެހޭނެ ކަމަށް ބުނެ ވަނީ ތުރުކީވިލާތަށް ޝުކުރު އަދާކޮށްފައެވެ. “މި ހަމަލާ ނާކާމިޔާބުކޮށްލުމަށް ތުރުކީވިލާތުގެ ސެކިއުރިޓީ ފޯސްތަކުން ނެގި އަވަސް ފިޔަވަޅުތައް އަހަރެމެން ބަލައިގަންނަން”، އޭނާ ބުނެފައިވެއެވެ.
ހަމަލާދިން މީހާ ނިރުބަވެރި ޖަމާޢަތަކާއި ގުޅުން އޮންނަކަމަށް ތުރުކީވިލާތުގެ ދާޚިލީ ވަޒީރު މުސްތަފާ ސިފްޓީ ފާހަގަކޮށްފައިވާއިރު، އެޤައުމުގެ ރައީސް އުރްދުގާން ވަނީ މިއީ “ޙިޔާނާތްތެރި ހަމަލާއެއް” ކަމަށް ސިފަކޮށްފައެވެ.
ފާހަގަކޮށްލެވޭ ގޮތުގައި ފަލަޞްތީނުގެ މުސްލިމުންނަށް އިޒްރޭލުން ދެމުންގެންދާ އަނިޔާވެރި ޢުދުވާނުގެ ސަބަބުން އައިއެސް އާއި އަލްޤާޢިދާ ފަދަ އިސްލާމީ ހަނގުރާމަވެރި ޖަމާޢަތްތަކުން ދަނީ ބަދަލުހިފުމުގެ ގޮތުން އިޒްރޭލުގެ ތަންތަނަށް ހަމަލާދިނުމަށް ހިތްވަރު ލައިދެމުންނެވެ. އަދި މި ހަމަލާގެ ޒިންމާ އެއްވެސް ޖަމާޢަތަކުން ނަގާފައެއް ނުވެއެވެ.
