މާލޭ އުތުރު ފަރާތު ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ދަށުން، ޝީޓް ޕައިލްކުރުމުގެ މަސައްކަތްތައް ފެށުމަށް ޓަކައި މަސްވެރިންގެ ޕާކުން ފެށިގެން ބޭންކް އޮފް މޯލްޑިވްސް (ބީއެމްއެލް) އާއި ހަމައަށް އޮންނަ މަގާއި ފަޅު ބަންދުކުރުމަށް ނިންމައިފިއެވެ.
މިކަމާ ގުޅިގެން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފައިވަނީ، ބޮޑުތަކުރުފާނު މަގުގެ ފުރަތަމަ ފިޔަވަހީގެ ދެވަނަ ސެގްމަންޓުން ފެށިގެން ހަތަރު ވަނަ ސެގްމަންޓާއި ހަމައަށް ޝީޓް ޕައިލްކުރުމުގެ މަސައްކަތް ފެށުމަށް ހަމަޖެހިފައިވާ ކަމަށެވެ. އެހެންކަމުން މިއަދުން ފެށިގެން ޖުލައި މަހުގެ ހަތަރު ވަނަ ދުވަހުގެ ނިޔަލަށް އެ ސަރަޙައްދުގެ މަގާއި ފަޅު ބަންދުކުރާނެކަމަށް އެ ކުންފުނިން ވަނީ ބުނެފައެވެ.
ޝީޓް ޕައިލްކުރުމުގެ މަސައްކަތް ފެށުމުގެ ކުރިން އެ ސަރަޙައްދުގެ ފަޅުގައި މި ވަގުތު އަޅާފައިވާ އޮޑިދޯނިފަހަރު ނަގައި، ހުސްކޮށްދިނުމަށް އެމްޓީސީސީން ވަނީ އެދިފައެވެ.
ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ ޢަމަލީ މަސައްކަތް ފަށާފައިވަނީ މިދިޔަ 2025 ވަނަ އަހަރުގެ އޮގަސްޓް މަހުގެ 22 ވަނަ ދުވަހުއެވެ. މި މަޝްރޫޢުގެ ދަށުން ޖުމުލަ 1،088 މީޓަރުގެ ސަރަޙައްދެއްގައި ތާރު އަޅައިގެން ތަރައްޤީކުރުމަށް ހަމަޖެހިފައިވާއިރު އޭގެ ތެރެއިން ފުރަތަމަ ފިޔަވަހީގެ 390 މީޓަރުގެ ސަރަޙައްދުގެ މަސައްކަތް މިހާރު ވަނީ އެއްކޮށް ނިންމާލެވިފައެވެ.
ބޮޑުތަކުރުފާނު މަގު ތަރައްޤީކޮށް ނިމުމުން އެ މަގު ވެގެންދާނީ ދުއްވާ އުޅަނދުތަކަށް ބޭނުންކުރަން ފަސޭހަ، ޖާގަ ތަނަވަސް އަދި ހިނގާބިނގާވެ އުޅޭ ފަރާތްތަކަށް ރައްކާތެރި މަގުތަކަކަށް ކަމަށް އެމްޓީސީސީން ވަނީ ބުނެފައެވެ.
