ލޯކަލްކައުންސިލް އިންތިޚާބުގައި އިދިކޮޅު އެމްޑީޕީން ހޯދި ކާމިޔާބީ ފާހަގަކުރުމަށް ބޭއްވި ޖަލްސާއަކީ، ވަޅޯތާފަނާ ޖަލްސާއެއް ކަމަށާއި، އެ ޖަލްސާއިން ފައިދާވީ ސަރުކާރު ހިންގާ މައި ޕާޓީ ޕީއެންސީއަށާއި ރައީސް ޑރ. މުޢިއްޒުއަށް ކަމަށް ގަލޮޅު އުތުރު ދާއިރާގެ ކައުންސިލަރ ސައިފް ފާތިހު ވިދާޅުވެއްޖެއެވެ.
ސައިފް މިފަދައިން ވިދާޅުވީ އެމްޑީޕީގެ ތެރޭގައި ބައިބައިވުން އުފެދި އަނެއްކާވެސް ބަހުގެ ހަމަލާތައް ބަދަލުވަމުންދ ދަނޑިވަޅެއްގައެވެ. އެމްޑީޕީގެ ޖަލްސާގައި ރައީސް ނަޝީދަށް ފުރުސަތު ނުދިން މައްސަލާގައި އުފެދުނު ޒުވާބަށްފަހު، 2 ފެކްޝަނުން ސޯޝަލްމީޑިއާގައި ދަނީ ހޫނު ޒުވާބެއް ކުރަމުންނެވެ.
އެރޭގެ ޖަލްސާއަށް ޢިޝާރާތް ކުރައްވާ ސައިފް ވިދާޅުވީ އެމްޑީޕީގެ ޖަލްސާގައި ސާފު މެސެޖެއް ނެތް ތަނުގައި ސާފު އިސްތިރާޖެއް ނެތްކަމަށެވެ. އަދި ރައްޔިތުން އެދުނީ ކުރިއަށް ދާންވީ މަގާއި ޕްލޭން ސާފުވެ، ދެ ރައީސުންގެ ކިބައިން އުންމީދު އައުވެގެން ދިއުން ކަމަށްވީނަމަވެސް، ރައީސް ނަޝީދުއަށް ފުރުސަތު ނުދީ ހިފެހެއްޓުމަށް ރައީސް އިބްރާހިމް މުޙައްމަދު ސޯލިހު ނިންމެވީކަމަށް ސައިފް ވިދާޅުވިއެވެ.
ރޭގެ ވަޅޯތާފަނާ ޖަލްސާއިން ފައިދާވީ ރ @MMuizzu އަދި @pnc_secretariat އަށް.
ސާފު މެސެޖެއް ނެތް، ސާފު އިސްތިރާޖެއް ނެތް.
ރައްޔިތުން އެދުނީ ކުރިއަށް ދާންވީ މަގާއި ޕްލޭން ސާފުވެ، ދެ ރައީސުންގެ ކިބައިން އުންމީދު އައުވުން.
ނަމަވެސް ރ @MohamedNasheed އަށް ވާހަކަފުޅު ދެއްކެވުމުގެ…
— Saif Fathih (@aekofathih) April 7, 2026
ސައިފް ވިދާޅުވީ މިހިނގަމުންދާ ކަންކަމަކީ އެމްޑީޕީއަށް އެންމެ ރަނގަޅު ގޮތް ނޫންކަމުގައި ވިޔަސް، އެމްޑީޕީ މިސްރާބުކުރަން މިއަދު ޖެހިފައިވަނީ ރައީސް ސޯލިހުގެ ސިޔާސީ އެޑްވާންޓޭޖަށް. ކަމަށާއި މިއީ ދެރަކަމެއް ކަމަށެވެ.
ކައުންސިލަރު ސައިފް އަކީ މީގެ ކުރިން އެމްޑީޕީ ބައިބައިވީ ވަގުތުވެސް އެމްޑީޕީގެ ހަޤީޤީ މޭސްތިރިޔާ ރައީސް ނަޝީދު ފެކްޝަންގައި އެމަނިކުފާނާއިއެކު ހުންނެވި ބޭފުޅެކެވެ. އަދި އޭރުޖެހުނު މައްސަލަތައް ހައްލުކޮށް ސުލްހަވެ، އަލުން ރައީސް ނަޝީދާއިއެކު އެމްޑީޕީއާއި ގުޅި، ސިޔާސީ މަސައްކަތް ފެށިއެވެ. ދާދިފަހުން ނިމުނު ކައުންސިލް އިންތިޚާބުގެ ކުރިން ބޭއްވި ޕްރައިމަރީގައި ސައިފް ވާދަކުރުމުންވެސް އެމްޑީޕީ ސޯލިހު ފެކްޝަނުން އޭނާ ފެއިލްކޮށްލުމަށްފަހު ޓިކެޓް ހޯދައިދިނީ މާބޮޑު ތަޖުރިބާއެއްނެތް އެމްޑީޕީ އެކްޓިވިސްޓް ހަދީޖާ މުޙައްމަދު (ކެލާގޭ ހައްޖަ) އަށެވެ. އަދި އެ ޕްރައިމަރީ ތެރޭގައިވެސް އޭގެ ފަހުންވެސް ސައިފްއަށް ވެސް ވަރަށް ހަޖޫޖަހާ މަލާމާތްކޮށްފައިވެއެވެ. މިކަމުގައި އިސްރޯލެއް އަދާކުރީ ސިއްކަގޭ މީހުން ކަމަށް މަޢުލޫމާތުލިބެއެވެ، އެއީ އެމްޑީޕީ އިބޫ ސޯލިހު ފެކްޝަނެވެ.
ސައިފް އަކީ ރާއްޖޭން ބޭރުން މަތީ ތަޢުލީމު ހާސިލްކޮށްގެން އައިސް، ސިޔާސީ މައިދާނުގައި ޚިދުމަތްކުރައްވާ، މިއަދުވެސް ގަލޮޅު އުތުރު ދާއިރާގެ ކައުންސިލަރެވެ.
