އެމްޑީޕީގެ އެތެރޭގެ ކޯޅުން ބޮޑުވެ، ޕާޓީގެ އިސް މަޤާމުތަކުގައި ތިއްބެވި ބޭފުޅުން މަޤާމުތަކުން ވަކިކުރަން ފަށައިފިއެވެ.
މަޤާމުތަކުން ވަކިކުރަން ފަށާފައިވަނީ، ކުރީގެ ރައީސް މުޙައްމަދު ނަޝީދަށް ތާއީދުކުރާ އެ ޕާޓީގެ ބައެއް އިސް މަޤާމުތަކުގައި ތިއްބެވި ބޭފުޅުންކަމަށް ”އެކި އެމްވީ“ އަށް ވަނީ މަޢުލޫމާތު ލިބިފައެވެ.
އެމްޑީޕީގެ އިސް މަޤާމުތަކުގައި ތިއްބެވި ބައެއް ބޭފުޅުން މަޤާމުތަކުން ވަކިކުރަން ފަށާފައިމިވަނީ، ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ލިބުނު ކާމިޔާބީއާ ގުޅިގެން ކާނިވާ ސަރަޙައްދުގައި ރޭ ކުރިއަށް ގެންދިޔަ އުފާ ފާޅުކުރުމުގެ ރަސްމިއްޔާތުގައި ކުރީގެ ރައީސް މުޙައްމަދު ނަޝީދަށް ވާހަކަދައްކަވަން ފުރުޞަތު ނުދިނުމަށް އެ ޕާޓީގެ ލީޑަރޝިޕުން ނިންމުމާ ގުޅިގެން ނަޝީދުގެ ވަފާތެރިން އެކަމާ ފާޑުކިޔަމުން އަމާޒުކުރުމާ ގުޅިގެންނެވެ.
އެގޮތުން އެމްޑީޕީގެ ވަގުތީ ޗެއަރޕާސަން ޢަބްދުލްޣަފޫރު މޫސާ ސޮއިކޮށް އެމްޑީޕީގެ ލީގަލް ޑިރެކްޓަރު އަޙްމަދު މަޢުރޫފަށާއި އެ ޕާޓީގެ ޗެއަރޕާސަންގެ ނައިބު އިބްރާހިމް ވަޙީދު މަޤާމުން ވަކިކޮށްފައިވާކަން އަންގައި ސިޓީއެއް ފޮނުވައިފައެވެ. އެ ދެ ބޭފުޅުން މަޤާމުން ވަކިކޮށްފައިވަނީ ކޮން ސަބަބަކާ ހުރެ ކަމެއް އެ ސިޓީގައި ބަޔާންކޮށްދީފައެއްނުވެއެވެ.
މަޢުލޫމާތު ލިބިފައިވާ ގޮތުގައި, އެމްޑީޕީގެ އިސް މަޤާމުތަކުގައި ތިއްބެވި ބައެއް ބޭފުޅުން ވަކިން ޚާއްޞަކޮށް ކުރީގެ ރައީސް ނަޝީދަށް ވަފާތެރި ބޭފުޅުން މަޤާމުތަކުން ވަކިކުރަން އެމްޑީޕީގެ ޗެއަރޕާސަން ޢަބްދުލްޣަފޫރު މޫސާއަށް އަންގާފައިވަނީ ސީދާ އިބްރާހިމް މުޙައްމަދު ޞާލިޙްއެވެ.
އެމްޑީޕީ ތެރޭގައި މިހާރު އުފެދިފައިވާ ނުތަނަވަސްކަމުގެ ސަބަބުން ގިނަ ބަޔަކު އަންނަނީ އިބްރާހިމް މުޙައްމަދު ޞާލިޙާއި އެމްޑީޕީގެ ޗެއަރޕަރސަން ޢަބްދުލްޣަފޫރު މޫސާގެ އިތުރުން އެ ޕާޓީގެ ރައީސް ޢަބްދުﷲ ޝާހިދަށް ވަރަށް ބޮޑަށް ފާޑުކިޔަމުންނެވެ.
