މާލޭ ސިޓީގެ މޭޔަރުކަމުގެ މަޤާމަށް ވާދަކުރެއްވުމުން ވޯޓު ދެއްވި ހުރިހާ ރައްޔިތުން ކުރި އިތުބާރާއި ތާއީދު އަބަދު ވެސް ޝުކުރުވެރިކަމާއެކު ހަނދާން ބަހައްޓަވާނެކަމަށް ކޮންގްރެސް ޕާޓީގެ ޓިކެޓްގައި މާލޭ ސިޓީގެ މޭޔަރުކަމަށް ވާދަކުރެއްވި މޫސާ ޢަލީ ޖަލީލް ވިދާޅުވެއްޖެއެވެ.
މޫސާ ޢަލީ ޖަލީލް މި މޭރުމުން ވިދާޅުވީ ރޭ އާންމުކުރެއްވި ޝުކުރުގެ މެސެޖެއްގައެވެ. މި މެސެޖުގައި ޖަލީލް ވިދާޅުވީ، މާލެ ސިޓީގެ މޭޔަރުކަމުގެ މަޤާމަށް ކޮންގްރެސް ޕާޓީގެ ޓިކެޓްގައި ވާދަކުރުމުގެ ފުރުޞަތު ދެއްވިކަމަށްޓަކައި އަދި އިންތިޚާބުގައި ވެދެއްވި އެހީތެރިކަމަށްޓަކައި ރައީސުލްޖުމްހޫރިއްޔާ އަދި ކޮންގްރެސް ޕާޓީގެ ރައީސް ޑރ. މުޙައްމަދު މުޢިއްޒަށާއި އެ ޕާޓީގެ ލީޑަރޝިޕާއި މެންބަރުންނަށް އިޚްލާސްތެރިކަމާއެކު ޝުކުރު އަދާކުރައްވާ ކަމަށެވެ.
”މި ފުރުޞަތުގައި މި އިންތިޚާބު ކާމިޔާބުކުރެއްވި ހުރިހާ ކެންޑިޑޭޓުންނަށް މަރުޙަބާ ދަންނަވަން،“ – މޫސާ ޢަލީ ޖަލީލް ވިދާޅުވިއެވެ.
މޫސާ ޢަލީ ޖަލީލް އިތުރަށް ވިދާޅުވީ، ރާއްޖެއާއި ދިވެހި ރައްޔިތުންނަށް އަބަދު ވެސް އެދެނީ ފާގަތިކަމާއި ބާއްޖަވެރިކަން މާތްﷲ މިންވަރު ކުރެއްވުން ކަމަށެވެ.
