ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރާ ދެކޮޅަށް މަސައްކަތްކުރަމުންގެންދާ، ރައްޔިތުންގެ މަޖިލީހުގެ މާފަންނު ދެކުނު ދާއިރާގެ މެންބަރު އަސްމާ ރަޝީދުގެ ޢާއިލީ މީހުން ސަރުކާރުގެ އިސް މަޤާމުތަކުން ވަކިކުރަން ފަށައިފިއެވެ.
އަސްމާގެ ޢާއިލީ މީހުން ސަރުކާރުގެ އިސް މަޤާމުތަކުން ވަކިކުރަން ފަށާފައި މިވަނީ، ސަރުކާރާ ދެކޮޅަށް މަސައްކަތްކުރާނެކަމަށް ބުނެ، އޭނާ ދައްކާފައިވާ ވާހަކަތަކެއްގެ ފޯނު ކޯލް ރިކޯޑިންގއެއް މީސްމީޑިއާގައި ދައުުރުވަމުންދާ ދަނޑިވަޅެއްގައެވެ.
މި 12 މިނެޓުގެ ފޯނު ކޯލުގެ ރިކޯޑިންގގައި އަސްމާ ވަނީ، ވެރިކަން ކުރާ ޕާޓީ ޕީއެންސީގެ ލީޑަރޝިޕްގައި ތިއްބެވި ފަރާތްތަކަކީ ދޮގުވެރި ބައެއްގެ ގޮތުގައި ސިފަކުރައްވައި، އެ ފަރާތްތަކުގެ ބޮލުގައި ދޮގު އިލްޒާމްތަކެއް އަޅުވައިފައެވެ. އަސްމާ ބުނީ ޕީއެންސީގެ ލީޑަރޝިޕުން އަންގާ އެއްވެސް އެންގުމަކަށް ބޯނުލަބާނެ ކަމަށާއި، އެ ފަރާތްތަކުން ވިދާޅުވާ އެއްވެސްކަމެއް ނުކޮށްދޭނެ ކަމަށެވެ.
ސަރުކާރުގެ މަޤާމުތަން ވަކިކުރެވުނު އަސްމާގެ ޢާއިލީ މީހުންގެ ތެރޭގައި، ޔޫއޭއީގައި ހުންނަ ދިވެހި ސަފީރު މުޙައްމަދު ޙުސައިން ޝަރީފް (މުންދު) ގެ އިތުރުން، ރާއްޖެއިން އދއަށް ކަނޑައަޅާފައި ހުންނަ ދާއިމީ މަންދޫބު ޑރ. ސަލްމާ ރަޝީދު ވެސް ވަނީ މަޤާމުން ވަކިކޮށްފައެވެ. ޑރ. ސަލްމާއަކީ އަސްމާގެ އެއްބަނޑު އެއްބަފާ ކޮއްކޮއެވެ.
މަޤާމުތަކުން ވަކިކޮށްފައިވާ އެހެނިހެން ބައެއް ފަރާތްތަކަށް ބަލައިލާއިރު:
- އެގްރޯ ނެޝެނަލް ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރު ޙުސައިން ދީދީ
- ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޑެޕިއުޓީ މެނޭޖިންގ ޑިރެކްޓަރު މުޙައްމަދު އަސްބާޙް ޢަލީ ނަސީރު
- ފެނަކަ ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރު މުޙައްމަދު ނަޖާހު
- އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު އިބްރާހިމް ޝާހިދު
- މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ މެނޭޖިންގ ޑިރެކްޓަރު މުޙައްމަދު ރިޝްވާން
ސަރުކާރުގެ އިސް މަޤާމުތަކަކީ ރައީސުލްޖުމްހޫރިއްޔާގެ އިތުބާރު އޮޮންނަ ފަރާތްތަކަށް ދެއްވާ މަޤާމުތަކެއް ކަމަށްވާއިރު، ސަރުކާރުގެ ސިޔާސަތުތައް ތަންފީޒުކުރުމުގެ ބަދަލުގައި ސަރުކާރާ ދެކޮޅަށް މަސައްކަތްކޮށް، ސަރުކާރު ބަލިކަށިކުރުމަށް މަސައްކަތްކުރާ ފަރާތްތަކަށް އެ ފުރުޞަތު އޮވެގެން ނުވާނެކަމަށް ގިނަ ބަޔަކު ދެކެއެވެ.
މި މައްސަލައާ ގުޅިގެން ގިނަ ބައެއްގެ ފާޑުކިޔުންތައް އަސްމާއަށް އަމާޒުވެފައިވާއިރު، ކޮންގްރެސް ޕާޓީގެ އާންމު މެންބަރުން ބުނަމުންދަނީ އޭނާއަކީ ޕާޓީއަށް ޚިޔާނާތްތެރިވެފައިވާ މީހެއް ކަމަށެވެ.
އަސްމާއަކީ ރައްޔިތުންގެ މަޖިލީހުގައި ވެސް އެދެވޭ މަސައްކަތެއް ނުކުރާ މީހެއްގެ ގޮތުގައި ސިފަކޮށް، އޭނާގެ އޭނާގެ ގޮނޑި އަތުލުމަށް ވެސް އެ ފަރާތްތަކުން އަންނަނީ ގޮވާލަމުންނެވެ.
